Og'ir atletika. Ikki nafar vakilamiz Osiyo chempioni bo'ldi

Mazkur chempionat Tokio olimpiadasiga qimmatli reyting ochkolarni taqdim etadi. Biroz avval ayollar o'rtasida -71 va -76 kg vaznda kuchlilar saralandi. Quvonarlisi, -71 kgda yurtimiz sharafini himoya qilgan iqtidorli atletimiz Nigora Suvonova dast ko'tarishda 86 kg bilan kumush, siltab ko'tarishda 113 kg bilan oltin medal, ikki kurash yakuniga ko'ra 199 kg og'irlikni o'ziga bo'ysindirib yana bir oltin medalni qo'lga kiritdi va Osiyo chempioni bo'lishga erishdi. Yaponiyalik Sagava Runa dast ko'tarishda 87 kg og'irlikni ko'tarib birinchi o'rinni egalladi, siltab ko'tarishda 111, ikki mashqda 198 kg og'irlikni ko'targan holda kumush medallarga munosib deb topilgan bo'lsa, shohsupaning 3-o'rnini Suriya terma jamoasi azosi Merna Hasan (82+103=186) band etdi.

-76 kg vaznda hamyurtimiz Tursunoy Jabborova dast ko'tarishda 107 kg, siltab ko'tarishda birinchi urinishning o'zidayoq 123 kg og'irlikni zabt etib oltin medallarga ega chiqdi. Suriya vakilasi Janghili Mari ikki kurash yakuniga ko'ra(83+105=188) kumush medallarga ega bo'ldi. Dast ko'tarishda Xitoy Taipeyi vakilasi CHiu CHing Yi 81 kg bilan bronza medalga loyiq topilgan bo'lsa, siltab ko'tarish va ikki kurash natijasiga ko'ra qolgan ikkita bronza medal uning vatandoshi Pan YU-Ru (80+97=177 kg) ga nasib etdi.

Musobaqadan so'ng

"Qizlarimizning bugungi ishtirokidan xursandman. Nigora o'z vaznidagi eng yoshi bo'lishiga qaramay o'zini ko'rsatoldi. To'g'risini aytsam, undan oltin medal kutmagandim. Nigoraga bo'lgan ishonchim yanada ortdi. Tursunoyga keladigan bo'lsak, uning oldiga chempionlikni qo'ygandik va Tursunoy bu marrani zabt etdi. Har ikki qizimiz ham kelgusi musobaqalarda bu natijalarni yanada yaxshilashlariga ishonaman", - deydi chempionlar murabbiyi Bahrom Mendibaev.

"Hayotimdagi eng hayajonli daqiqalar. CHempion bo'lishimgacha bo'lgan yo'lda meni qo'llab-quvvatlagan, ishonch bildirgan ota-onam, ustozlarimdan minnatdorman. Musobaqaning o'z yurtimizda bo'layotgani, xalqimizning olqishlari bugungi yutug'imda muhim rol o'ynadi. SHu erga kelib bizga kuch berib turgan katta ustozimiz - Erkin bobo Karimovga alohida rahmat aytaman. Albatta, oldimizda kattalar o'rtasidagi Osiyo chempionati turibdi. Qozog'istonda ham munosib ishtirok etib Top-10ga kirishni maqsad qilganman", - deydi, shaxsiy rekordini yangilagan Tursunoy Jabborova.

SHunday qilib bugungi bellashuvlarda Turunoy Jabborova va Nigora Suvonova ham o'smirlar ham yoshlar o'rtasida Osiyo chempioni nomiga sazovor bo'lishdi.

Sarvinoz Raxmonqulova tayyorladi