Olimpiada sari: Tarixda ilk bor kamondan otish bahslarida qatnashamiz (Barcha tafsilotlar)

Olamsport.com nashri shu munosabat bilan Parij-2024 Olimpiadasidagi o'zbekistonlik sportchilarning ishtirokiga oid qiziqarli malumotlarni bo'lishib boradi.

Bu yilgi musobaqada tarixda ilk bor o'zbekistonlik sportchilar kamondan o'q otish bahslarida ishtirok etadi.

Bellashuvlarda ikki nafar hamyurtimiz — Ziyodaxon Abdusattorova hamda Amirxon Sodiqov yurtimiz sharafini himoya qiladi.

Ziyodaxon Abdusattorova 2023 yil noyabr oyida Tailandning Bangkok shahrida o'tkazilgan Osiyo licenzion turnirida yakkalik dasturida finalga qadar etib borib, to'rt yillikning eng muhim musobaqasi uchun yo'llanmaga ega chiqqan edi.

Musobaqadan keyin bergan interyusida Ziyodaxon u uchun barcha uzilgan o'qlar muhim ekani, o'q uzishdan oldin xayoli faqatgina 10 ochkoni ko'zlashda bo'lishini aytib o'tgan edi.

Olimpiadada Abdusattorova ishtirok etadigan ayollar o'rtasidagi individual bahslar 25 iyul kunidan start oladi. Bellashuvlarda umumiy 64 nafar sportchi g'oliblik uchun kurash olib boradi. Ular dastlab, reyting bahslarini o'tkazishadi. SHundan so'ng, 4 avgust sanasidan boshlab, asosiy bellashuvlar boshlanadi.

Amirxon Sodiqov qatnashadigan erkaklar o'rtasidagi yakkalik dasturida ham huddi shunday holat. Ayollar o'rtasidagi yakkalik bellashuvlariga 3 avgust, erkaklar bahslariga 4 avgust kuni yakun yasaladi. 

Bundan tashqari, Ziyodaxon va Amirxon mikst dasturida ham chiqish qiladi. Ushbu dasturdagi o'yinlar 2 avgust kuni o'tkaziladi. 

Malumot uchun, kamondan o'q otish bahslarida eng ko'p licenziyalar Xitoy, Xitoy Taypeyi, Franciya (mezbonlik huquqi tufayli), Buyuk Britaniya, Hindiston, Meksika, Koreya Respublikasiga nasib etgan (6).