OLIMPIADAGACHA. Afinadagi Olimpiada O'zbekiston uchun qanday o'tgan? (Mutolaa uchun)

Delegaciyamiz vakillari 15 ta sport turidan 69 nafar sportchi (51 nafar erkak, 18 nafar ayol) bilan o'yinlarda O'zbekiston sharafini himoya qilgan.

Qaysi sport turidan necha nafar sportchi ishtirok etgan? 

Boks - 9 nafar 

Erkin kurash - 5 nafar 

Yunon-rum kurashi - 2 nafar 

Sport gimnastikasi - 1 nafar 

Baydarka va kanoeda eshkak eshish - 7 nafar 

Akademik eshkak eshish - 4 nafar 

Dzyudo - 6 nafar 

Engil atletika - 10 nafar

Suzish - 15 nafar 

O'q otish - 2 nafar 

Og'ir atletika - 3 nafar 

Stol tennis - 1 nafar 

Tramplindan sakrash - 1 nafar

Velosport - 1 nafar 

Taekvondo - 2 nafar.

Sovrindorlar 

O'zbekiston ushbu Olimpiya o'yinlarida 2 ta oltin, 1 ta kumush va 2 bronza medalni qo'lga kiritgan. Erkin kurash bo'yicha og'ir vaznda Artur Taymazov hamda yunon-rum kurashidan 74 kg vaznda Aleksandr Dokturishvili oltin medalga ega chiqqan. SHuningdek, yana bir kurashchimiz Magomed Ibragimov 96 kg vaznda finalga qadar etib borib, yakunda kumush medalni o'ziniki qilgan. Ikki bronza medal bo'lsa bokschilarimiz O'tkirbek Haydarov va Bahodirjon Sultonov tomonidan taqdim etilgan. 

O'zbekiston ushbu natija bilan medallar jamg'arish bo'yicha umumjamoa hisobida 35-o'rinni band etgan. Reytingning birinchi pog'onasini AQSH (36 ta oltin, 39 ta kumush, 26 ta bronza), ikkinchi o'rnini Xitoy (32 ta oltin, 17 ta kumush, 14 ta bronza) egallagan bo'lsa, kuchli uchlikka esa Rossiya (25 ta oltin, 25 ta kumush, 38 ta bronza) yakun yasagan.

Greciyada bo'lib o'tgan Olimpiya o'yinlarida 201 ta mamlakatdan 10625 nafar sportchilar 37 ta sport turi bo'yicha ishtirok etgan.

Habib Jo'raboev tayyorladi