Olmaliqlik gandbolchi qizlar “Mustaqillik kubogi” sohibalari + FOTO

O'zbekiston Respublikasi Sportni rivojlantirish vazirligi, O'zbekiston gandbol federaciyasi va boshqa tashkilotlar hamkorligida tashkil etilgan mazkur nufuzli musobaqada Samarqand, Namangan, Sirdaryo viloyatlari, Toshkent shahri terma jamoasi, shuningdek, “Yoshlik” (Xorazm), ROPZK (Toshkent), OKMK (Toshkent vil.) va SK “Turan” (Turkiston, Qozog'iston) jamoalari bosh sovrin uchun o'zaro bahs olib borishdi. 

Yakuniy natijalarga etibor qaratsak, uchinchi o'rin uchun kechgan o'yinda Qozog'istonning “Turan” jamoasi Toshkent shahri terma jamoasini bir to'p farqi bilan mag'lubiyatga  uchratdi - 38:37. 

Finalda esa Toshkent viloyatining OKMK hamda Samarqand viloyati jamoalari ro'baro' kelishdi. Ushbu uchrashuv olmaliqlik gandbolchi qizlarning 44:33 hisobidagi g'alabasi bilan nihoyasiga etdi. 

Natijada OKMK jamoasi “Mustaqillik kubogi” sohibiga aylandi.

Musobaqaning yopilish marosimi tantanali tarzda tashkil etildi. G'olib va sovrindor jamoalar tashkilotchilar tomonidan tegishli darajada taqdirlanishdi.

Yakuniy jadval: 1-o'rin. OKMK. 2-o'rin. Samarqand. 3-o'rin. SK “Turan”. 4-o'rin. Toshkent shahri. 5-o'rin. “Yoshlik”. 6-o'rin. Namangan. 7-o'rin. ROPZK. 8-o'rin. Sirdaryo.

Ushbu musobaqa noyabr oyining oxiri va dekabr oyining boshida Janubiy Koreya davlatida ayollar o'rtasida o'tkaziladigan Osiyo chempionati oldidan O'zbekiston ayollar terma jamoasiga nomzodlarni saralab olish imkonini berdi.