O'rta CHirchiqda sportning texnik va amaliy turlari yana ham rivojlanadi

O'zbekiston mudofaasiga ko'maklashuvchi “Vatanparvar” tashkiloti yoshlar o'rtasida harbiy vatanparvarlik targ'iboti, sportning texnik va amaliy turlarini rivojlantirish orqali sog'lom turmush tarzini targ'ib qilish hamda “Vatanparvar” tashkilotining asosiy faoliyat turlaridan bo'lgan avtomototransport haydovchilari tayyorlash va mamlakatimizda sportning ommaviyligini oshirish kabi ezgu - maqadlarni ko'zlagan. 

Xususan, O'rtachirchiq tuman kengashi o'quv sport texnika klubida ham sportning texnik va amaliy turlari bilan o'g'il-qizlar zo'r ishtiyoq shug'ulanishadi. Javlon Po'latov rahbarlik qilayatgan ushbu o'quv sport texnika klubida yuz nafardan ortiq tuman yoshlari o'q otish, yozgi biatlon va avtoralli turlari bo'yicha mashg'ulotlarda ishtirok etishadi. Yozgi biatlon va o'q otish sport turlaridan tajribali murabbiy Leonid Yugay qo'l ostida, munosib sharoitda shug'ullanayotganlar orasida iqtidorli sportchilar ko'pchilikni tashkil etadi. SHaxnoza Mirzaeva, SHukrona Baybusova, Rustam G'ofurov, Temur Abilxayrov, Valeriya Radionov singari shogirdlarning iqtidorini murabbiy yaxshi baholaydi. Boisi, ular o'tkazilayotgan turli darajadagi musobaqalarda kuchlilar qatoridan joy olishga muvaffaq bo'lishadi.      

Avtoralli bo'yicha murabbiy-sportchi, sport ustasi Alisher Ahmadqulovning oldiga tushadigan rallichi viloyatda topilmasa kerak. Umrini shu sport turiga bag'shida etgan Alisher aka viloyat sharafini o'zoq yillardan buyon munosib himoya qilib kelmoqda. Bu borada yoshlar u kishidan o'rnak olsa arziydi. Klub boshlig'i Javlon Po'latovning takidlashicha, keyingi yillardan sport sekciyalari sonini ko'paytirish va yanada ko'proq o'quvchi-yoshlarni jalb etish maqsadida velosport va karting turlarini ochishni mo'ljal qilishgan. Demak, O'rtachirchiq tumanida sportning texnik va amaliy turlari yanayam rivojlanadi.    

Ilhom RAHMONOV tayyorladi, o'z muxbirimiz