Osiyo chempionati. SHamsiddin Vohidov hamon ikkinchi o'rinda, bugun so'nggi tur o'tkaziladi

Mukofot jamg'armasi 80 000 AQSH dollarini tashkil etuvchi mazkur musobaqada O'zbekiston terma jamoasi ham katta tarkibda qatnashyapti. Qita chempionatining erkaklar o'rtasidagi bahslarida 33 mamlakatdan 156 nafar ishtirokchi medallar uchun dona surmoqda. 

Osiyo chempionatining 8-turida hamyurtlarimiz orasida eng yaxshi ko'rsatkichga ega bo'lib turgan grossmeysterimiz SHamsiddin Vohidov (2641) oq donalarda rossiyalik grossmeyster Ivan Zemlyanskiy bilan durangga imzo chekdi. Bu ochko yo'qotilishi uning chempion bo'lish imkoniyatini yo'qqa chiqardi. SHamsiddin 6 ochko bilan qo'shimcha ko'rsatkichlarga ko'ra 2-o'rinni saqlab qoldi. 

Osiyo chempionatida qatnashayotgan birinchi raqamli shaxmatchimiz Nodirbek Yakubboev (2665) oq donalarda hindistonlik xalqaro master Asvatni mag'lubiyatga uchratdi. Bu bilan Nodirbek 5,5 ochko bilan qo'shimcha koeficentlar bo'yicha 14-o'ringa ko'tarilib oldi. Oltinchi pog'onadagi hind shaxmatchisida ham 5,5 ochko bor.   

Afsuski, Muhiddin Madaminov 8-turda qora donalarda hindistonlik grossmeyster Narayananga yutqazib qo'ydi. Muhammadzohid Suyarov qora donalarda rossiyalik Kiril SHubin bilan murosaga keldi. Bu turda hamyurtlarimizdan Humoyun Begmuratov, Asrorjon Omonov, Asilbek Abdulazizov va Oriyat Obidjonov raqiblariga imkoniyatni boy berdi. Afruzbek Sobirov va Saidxon Ashikmamutovda g'alaba, Miraziz Matyoqubov va Bahrom Baxrillaevning partiyalarida durang qayd etildi. 

Musobaqa peshqadami eronlik Bardiya Daneshvar (2621) 8-turda hindistonlik Puranik Abhimanyu ustidan juda muhim g'alabani qo'lga kiritib, deyarli Osiyo chempionligini naqd qildi. Bugun o'tkaziladigan so'nggi turda uni durang natija ham qanoatlantiradi. 

Etiborga molik jihati shundaki, bugun so'nggi 9-turda o'zbek klassik derbisiga guvoh bo'lamiz. SHamsiddin Vohidov qora donalarda Nodirbek Yakubboevga qarshi bahs olib boradi. Ushbu bahs jahon kubogi taqdirini ham hal qiladi. SHamsiddin kamida durang o'ynasa, ushbu yo'llanmani qo'lga kiritishi mumkin bo'ladi. G'alaba esa kumush medal va jahon kubogi chiptasini kafolatlaydi.