Osiyo chempionatida 34ta medal qo'lga kiritildi, shulardan 16tasi oltin + FOTO

Qita chempionatida muvaffaqiyatli ishtirok etgan O'zbekiston terma jamoasi azolari yakunda blic, rapid va standart yo'nalishlarda jami 34ta medalni qo'lga kiritishdi. SHulardan 16tasi oltin, 11tasi kumush, 7tasi bronza medallaridir. 

Tabiiyki, umumjamoa hisobida shaxmatchilarimiz barcha ishtirokchi davlatlar orasida birinchi o'rinni egallashdi. Yosh shaxmatchilarimizdan 7 nafari 2019 yili Tunis davlatida o'tkaziladigan maktab o'quvchilari o'rtasidagi jahon chempionatida qatnashish huquqini qo'lga kiritishdi. 

Hamyurtlarimizdan 13 yoshlilar musobaqasida ishtirok etgan Umida Omonova (WCM) musobaqaning mutloq g'olibasiga aylandi. U standart, rapid va blic yo'nalishlarida 3ta oltin medalni qo'lga kiritdi. 

Humoyun Bekmurodov (9 yosh, SM) standart va rapidda oltin, blic yo'nalishda kumush medalga sazovor bo'ldi.  Afruza Hamdamova (9 yosh, WCM) standart va rapidda oltin, blicda kumush medal bilan taqdirlandi. Davlatbek Mahmudjonov (11 yosh) standart va blic yo'nalishda oltin, rapid yo'nalishida bronza medaliga ega chiqdi. 

Abdumalik Abdusalimov (17 yosh, FM) standart yo'nalishda oltin, rapid va blicda kumush medallar bilan taqdirlandi. Sitora Saparova (17 yosh) standart, blic va rapid yo'nalishlarida mos ravishda oltin, kumush hamda bronza medalini qo'lga kiritdi. 

Ali Qosimov (15 yosh) standart yo'nalishda Osiyo chempioni, rapidda esa kumush medalga sazovor bo'ldi. Muhammadali Abdurahmonov (17 yosh) blicda oltin, rapid va standartda bronza medaliga loyiq ko'rildi.

Ruqiya Olimova (7 yosh) blicda oltin, standartda kumush, Zilola Aktamova (11 yosh) blicda oltin, rapidda kumush, Olmos Rahmatullaev (13 yosh) rapidda oltin, stantdartda kumush, Tohir Nematov (7 yosh) blicda kumush, rapid yo'nalishida bronza medaliga ega chiqdi. 

Mohinur Habibullaeva (13 yosh) blicda kumush, Muhammadzohid Suyarov (9 yosh) esa aynan shu yo'nalishda bronza medalini qo'lga kiritdi.