Osiyo chempionatida o'zbek sportchilari uchun atalgan kun

Ushbu musobaqalarda o'zbekistonlik sportchilar ham ishtirok etishmoqda. Terma jamoamiz sharafini yoshlar o'rtasidagi bahslarda 11, kattalar o'rtasidagi bellashuvlarda esa 19 nafar sportchi himoya qilmoqda.

Musobaqaning bugungi kuni sportchilarimiz uchun omadli kechmoqda. Yoshlar o'rtasidagi bahslarda JM2 yo'nalishida Davrjon Davronov/Evgeny Agafonov tandemi terma jamoamiz uchun turnirdagi ilk oltin medalni taqdim etdi. Malumot uchun, aynan ushbu sportchilar Buenos-Ayresda bo'lib o'tadigan o'smirlar Olimpiya o'yinlarida yurtimiz sharafini himoya qiladilar.

Kattalar o'rtasida o'tkazilayotgan bahslarda M2x yo'nalishida SHahboz Abdujabborov hamda Abdullo Muhammadiev juftligi oltin, Bekzod Xolmirzaev va Abubakir Uzoqboev tandemi bronza medaliga sazovor bo'lishdi. Ushbu yo'nalishda ikki o'zbek ekipaji sovrindorlar qatoridan joy olgani diqqatga sazovor. Bahslar Olimpiya yo'nalishi, yani 2000 metr masofa bo'yicha o'tkazilmoqda.

M1X yo'nalishida SHaxboz Xolmurzaev terma jamoamiz hisobiga navbatdagi kumush medalni qo'shib qo'ydi. M2 bahslarida Alisher Turdiev va Sardor To'lqinxo'jaevdan tashkil topgan juftlik musobaqaning oltin medalini qo'lga kiritdi.

LM4 yo'nalishidagi bellashuvlarda Zafar Usmonov, SHohjahon Najmiev, Islambek Mambetnazarov, SHexroz Hakimovlardan tashkil topgan kvartet terma jamoamiz hisobiga navbatdagi oltin medalni qo'shib qo'ydi.

Demak, bugungi kun yakunlariga ko'ra, terma jamoamiz azolari 4ta oltin, 1ta kumush va 1ta bronza medallarini qo'lga kiritishdi. Musobaqa ertaga yakuniga etadi.