Osiyo Millatlar kubogi-2018da 4-tur ortda qoldi

Kecha standart shaxmat bahslarida 4-tur uchrashuvlari o'tkazildi. Xabaringiz bor, Osiyoning kuchli shaxmat jamoalari qatnashayotgan ushbu nufuzli musobaqada O'zbekiston erkaklar va ayollar terma jamoalari ham ishtirok etyapti. 

Yosh shaxmatchilardan iborat erkaklar terma jamoamiz grossmeysterlardan tarkib topgan Vetnamga qarshi dona surdi. Birinchi doskada 16 yoshli xalqaro master Yakubboev Nodirbek oq donalarda (2512) GM Nguyen Ngoc Truong Son (2618) bilan, uchinchi doskada Javohir Sindarov (2474) esa GM Nguyen Duc Hoa (2441) bilan durangga imzo chekdi. IM Xoroshev Nikita va FM Abdisalimov Abdimalik esa qora donalarda vetnamlik grossmeysterlarga imkoniyatni boy berishdi.

SHunga qaramay, keyingi turda Bangladesh terma jamoasini mag'lub etishdi. To'rtinchi tur natijasi 1½:2½ hisobida O'zbekiston foydasiga hal bo'ldi. Beshinchi tur oldidan O'zbekiston erkaklar terma jamoasi Hindiston bilan 4-5 o'rinlarni bo'lishib turibdi. 

Bugun, 1 avgust kuni 5-turda O'zbekiston erkaklar terma jamoasi Eronning Iran Red (o'rtacha reytingi - 2508) shaxmatchilariga qarshi bahs olib boradi. 

Musobaqada ishtirok etayotgan O'zbekiston ayollar terma jamoasi ham sovrinli o'rinlar uchun kurash olib boryapti. Qizlarimiz avvaliga 3-turda Suriya terma jamoasini 4:0 hisobida mag'lub etishdi. Lekin 4-turda ular ancha kuchli hisoblangan vetnamlik dugonalariga yutqazib qo'yishdi.

Xuddi erkaklar terma jamoamizda bo'lgani kabi birinchi va uchinchi doskada o'ynagan shaxmatchilarimiz WGM Gulruhbegim Tohirjonova hamda WIM Irina Gevorgyan raqibalari bilan durang qayd etishdi. Qora donalarda harakat qilgan qolgan ikki qizimiz esa o'z partiyalarini boy berishdi. 

Bugun o'tkaziladigan 5-tur oldidan O'zbekiston ayollar terma jamoasi turnir jadvalida 4-o'rinni egallab turibdi. Qizlarimizni oldinda Qozog'iston, Eron va Xitoy terma jamoalariga qarshi o'tkaziladigan bir-biridan murakkab uchrashuvlari kutib turibdi. 

Xalqaro hakamlar jamoasi