Osiyo Millatlar Kubogi. 5-turda har ikki jamoamiz mag'lub bo'ldi

Kecha standart shaxmat bo'yicha o'tkazilayotgan turnirda 5-tur uchrashuvlari o'tkazildi. Bu turda O'zbekiston erkaklar va ayollar terma jamoamiz raqiblariga bir xil ½ :3½ hisobida imkoniyatni boy berdi.

Erkaklar jamoamiz Eronning Iran Red (o'rtacha reytingi 2508) shaxmatchilariga yutqazib qo'ydi. Birinchi doskada harakat qilgan 16 yoshli xalqaro master Nodirbek Yoqubboev eronlik mashhur grossmeyster 35 yoshli Ehson Magami bilan durang o'ynadi. Eronlik bu shaxmatchi 8ta xalqaro olimpiadada ishtirok etgan. Qolgan shaxmatchilarimiz mag'lubiyat alamini totib ko'rishdi. 

Bugun 2 avgust kuni 6-turda O'zbekiston erkaklar terma jamoasi 2-doskada turnir jadvalida ikkinchi o'rinni egallab turgan Xitoy (o'rtacha reytingi 2609) terma jamoasi shaxmatchilariga qarshi dona suradi.

O'zbekiston ayollar terma jamoasi (o'rtacha reytingi 2256) esa qozog'istonlik dugonalariga (o'rtacha reytingi 2404) imkoniyatni boy berishdi. Birinchi doskada o'ynagan WGM Gulruhbegim Tohirjonova xalqaro master, 20 yoshgacha shaxmatchilar o'rtasida jahon chempioni Dinara Saduakassova bilan durang qayd etdi. Bugun 6-turda qizlarimiz turnir jadvalida 3-o'rinni egallab turgan Eronning Iran Green (2270) jamoasiga qarshi bahs olib borishadi