Osiyo o'yinlari. Bugun bittadan oltin va bronza medalini qo'lga kiritdik

O'z tarixida beshinchi bor o'tkazilayotgan qita o'yinlarida O'zbekiston sport delegaciyasi ham bir nechta sport turlarida medallar uchun bahslarga kirishgan. Bugun o'tkazilgan bahslardan so'ng terma jamoamiz hisobidagi medallar soni 5taga etdi. SHulardan 3ta oltin, bittasi kumush hamda bronza medallaridir.

Bugun sambo bo'yicha o'tkazilgan musobaqada sportchilarimiz bittadan oltin va bronza medalini terma jamoamizga taqdim etishdi. -90 kg vazn toifasida gilamga chiqqan Ikromjon Yo'ldoshev barcha raqiblarini mag'lubiyatga uchratib, shoxsupaning eng yuqori pog'onasiga ko'tarildi.

U final bahsida qozog'istonlik Alibek Zekenovdan ustun keldi. Finalgacha bo'lgan bahslarda esa livanlik Kevin Nikolaos, tailandlik Sonram Jengxor, eronlik Iraj Amirxanidan ustun ekanligini amalda isbotladi.

Samboning ayollar o'rtasidagi -56 kg vazn toifasidagi bahslarida ishtirok etgan Malikabonu Mirzaeva bronza medali bilan taqdirlandi. U yarim finalda mezbonlar vakilasiga yutqazib qo'ydi. Bronza medali uchun kechgan bahsda esa tailandlik Sasipilay CHaysangni taslim etdi.