O'smirlarimiz Slovakiyaga qarshi ikkinchi o'yinda ham durang o'ynadi

Kecha bo'lib o'tgan ushbu uchrashuv jamoalarning teng kurashlari ostida o'tdi. Jamoalar ancha hujumkor o'yin namoyish etganiga qaramay, uchrashuv 0:0 hisobidagi durang natija bilan yakun topdi.

30 avgust kuni bo'lib o'tgan Slovakiya o'smirlariga qarshi dastlabki o'rtoqlik ucharshuvida ham Temur Olimxo'jaev boshchiligidagi O'zbekiston o'smirlar terma jamoasi durang natija (1:1) qayd etgandi.

Bugun O'zbekiston U-16 terma jamoasi Sloovakiyadagi yig'inini yakunlaydi va 3 sentyabr kuni Toshkentga qaytib keladi. Toshkentda bir haftalik yakuniy yig'in o'tkaziladi va 9 sentyabr kuni jamoa Hindistonga yo'l oladi.

Eslatib o'tamiz, O'zbekiston o'smirlar terma jamoasi Osiyo chempionati final bosqichida KXDR, Tailand hamda Yaman o'smirlar terma jamoalari bilan bir guruhdan o'rin olgan.