Oston O'runov "Navbahor" bilan shartnomasini uzaytirdi

2018 yilgi mavsumda o'zining ajoyib o'yinlari bilan namanganlik muxlislar mehrini qozona olgan yosh, istedodli futbolchi Oston O'runov 2019 yilgi mavsumni ham «Navbahor»da o'tkazadigan bo'ldi. Bu haqda «Navbahor» muxlislar klubining telegramdagi kanali xabar berdi.
 
Yarim himoyachi kelgusida faqatgina xorijdan taklif bo'lsagina «Navbahor»dan ketishi mumkinligini aytdi. Eslatib o'tamiz, futbolchi 28 dekabr kuni instagramdagi o'z sahifasiga quyidagi fikrni yozgan edi: 

- SHu jamoaga birinchi kelganimda meni hech kim tanimasdi. Hozirgi kunga etib kelishimda mana shu akalarimning juda katta o'rni bor. Ularning hammalariga rahmat, bir yarim yil sizlar bilan birga o'ynaganimdan xursandman. Bunday ahil jamoani boshqa ko'rmasam kerak, yana birga bo'lish nasib qilsin! Albatta, qo'llab-quvvatlaganliklari uchun muxlislarga ham rahmat. natijalarda ularning ham o'rni katta. 

Keyinroq uning Rossiya klubiga o'tishi mumkinligi haqida xabarlar chiqqan edi. Hozircha «Navbahor» matbuot xizmati O'runov bilan shartnoma uzaytirilgani borasida rasmiy xabar bergani yo'q.