O'zbekiston 3-o'ringa ko'tarilib olgan Olimpiadaning 7-turida asosiy raqiblarimiz qanday natija qayd etishdi? (FOTO+JADVAL)

Amaldagi Olimpiada chempioni hisoblangan O'zbekiston erkaklar terma jamoasi 7-turda ukrainalik shaxmatchilardan 3:1 hisobida ustun kelishdi. Yosh grossmeysterlarimiz 45-Butunjahon shaxmat Olimpiadasining bugun o'tkaziladigan 8-turida tarkibida tajribali shaxmatchilar jam bo'lgan Serbiya terma jamoasiga qarshi dona surishadi.  

Sakkizinchi tur oldidan 100 foizlik natija qayd etgan birgina Hindiston bo'lib turibdi. Hindlar 7 ta uchrashuvnig barchasida g'alaba qozonishgan. Eron va Gruziya ham hali mag'lubiyatga uchramagan. Forslar 6 g'alaba va 1 durang qayd etishgan. Gruzinlar 4 g'alaba va 3 durangga ega. O'zbekiston, Vengriya, Armaniston va bugungi raqibimiz Serbiya terma jamoasi 6 g'alaba va 1 mag'lubiyatga ega. AQSH, Xitoy va Vetnam terma jamoalari hisobida 5 g'alaba, 1 durang va 1 mag'lubiyat bor. 

O'zbekiston qo'shimcha ko'rsatkichlarga ko'ra 12 ochko jamg'arganlar orasida eng yuqori - 3-o'rinni egallab turibdi. Peshqadam Hindiston 12, ikkinchi o'rindagi Eron 13 ochkoga ega. Vengriya, Armaniston, Serbiya hisobida ham biz singari 12 ochkodan bor.   

Terma jamoamizning asosiy raqiblari 7-turda muhim g'alabalarga erishishdi. Hindiston markaziy uchrashuvda Xitoyni 2,5:1,5 hisobida engdi. Eron xuddi shu hisobda Vetnamdan ustun keldi. Vengriya ham shu hisob bilan Litva shaxmatchilaridan ustun keldi. O'zbekiston Ukrainani, Serbiya Niderlandiyani 3:1 hisobida mag'lubiyatga uchratdi. Armaniston - Angliya - 2,5:1,5. 

Bugun o'tkaziladigan 8-turning markaziy bahsi Hindiston va Eron terma jamoalari o'rtasida tashkil etiladi. Ushbu uchrashuvda raqiblarimizdan biri, balki ikkisi ham ochko yo'qotar. Biz esa o'z o'rnida Serbiyani taslim etsak, peshqadamga aylanishimiz mumkin. 

8-turning markaziy uchrashuvlari:

Eron - Hindiston

Vengriya - Armaniston

Serbiya - O'ZBEKISTON 

AQSH - Franciya

Xitoy - Ruminiya

Vetnam - Norvegiya

Gruziya - Niderlandiya