O'zbekiston butunjahon ko'chmanchi xalqlar o'yinlarida jami 33 ta medalni qo'lga kiritdi

Qirg'iziston Respublikasining CHo'lpon-Ota shahrida bo'lib o'tayotgan Butunjahon ko'chmanchi xalqlar o'yinlarining beshinchi kunida sportchilarimiz kurash va sambo bo'yicha ham bahslarga kirishgani, kurashchilarimiz Muxriddin Tilovov (-66kg) va Temurxon To'raev (-81 kg) o'yinlarning oltin medalini qo'lga kiritishgani hamda ko'pkarichilarimiz final chiqishgani haqida xabar bergan edik.

O'yinlarning ko'pkari bo'yicha final bahslarida Qirg'iziston jamoasi bilan kuch sinashgan jamoamiz mezbonlarga 32:9 hisobida imkoniyatni boy berib, kumush medalni qo'lga kiritdi. Ko'pkari bellashuvlarida 11 ta davlatdan tashrif buyurgan jamoalar ishtirok etib, O'zbekiston jamoasi Boshqirdiston, Franciya va Qozog'iston jamoalarini mag'lubiyatga uchrata oldi.

Sambo bo'yicha o'tkazilgan bahslarda ham vakillarimiz salmoqli natijalarni qo'lga kiritishdi. Yurtdoshlarimiz Davlat Samraev (-62 kg), Bekzod Karimov mutlaq vazn toifasida oltin medal bilan taqdirlangan bo'lsa, Omon G'aniev (-52kg), SHerbek Ro'ziev (-68kg) kumush medalga sazovor bo'ldi.

SHunday qilib, mazkur o'yinlardan ilk bora rasman ishtirok etayotgan O'zbekiston sport delegaciyasi yakuniy natijalarga ko'ra jami 33 ta medalni (7 ta oltin, 8 ta kumush, 18 ta bronza) qo'lga kiritib, umumjamoa hisobida beshinchi o'rinni egalladi .

O'zbekiston delegaciyasi 13 ta sport turi bo'yicha 58 nafar sportchi bilan ishtirok etib, kurash, sambo, gyulesh (Azarbayjon kurashi), ashirtmali aba gyuleshi (Turkiya kurashi), alish kurashi (Qirg'iziston kurashi), qirg'iz kurashi, armrestling, mas-restling, lochin ovi, uloq ko'pkari, otda engish turlari bo'yicha medallarni qo'lga kiritdi.