O'zbekiston delegaciyasi Para Osiyo o'yinlaridagi ishtirokini 79 ta medal bilan yakunladi + JADVAL

Olti kun davom etgan murosasiz bellashuvlarda O'zbekiston sport delegaciyasi jami 79 ta medal qo'lga kiritdi. Bu bilan terma jamoamiz Para Osiyo o'yinlari tarixida qo'lga kiritilgan medallar soni bo'yicha 5 yil avvalgi rekordni yangiladi. 

Indoneziyaning Jakarta va Palembang shaharlarida o'tkazilgan III Para Osiyo o'yinlarida 33 ta oltin, 24 ta kumush, 18 ta bronza, jami 75 ta medal bilan 53 davlat delegaciyalari orasida 5-o'rinni egallagan edik. Medallar soni bo'yicha rekord yangilandi, ammo sifat va umumjamoa hisobidagi o'rnimizda pasayish kuzatildi. 

Xanchjou arenalarida qo'lga kiritilgan oltin medallarimiz 25 tani tashkil etdi. Indoneziyadagi 33 ta oltin medal 2026 yilda Yaponiya davlati mezbonlik qiladigan Para Osiyo o'yinlarigacha rekordimiz bo'lib qoladi. Kecha yakuniga etgan Para Osiyo o'yinlarida 25 ta oltin, 24 ta kumush, 30 ta bronza medali bilan umumjamoa hisobida 8-o'rinni band etdik. 

Osiyo va Para Osiyo o'yinlarida "o'zga sayyoraliklar" deya tarif berilgan Xitoy terma jamoasi 214 ta oltin, 167 ta kumush, 140 ta bronza, jami 521 ta medal bilan umumjamoa hisobida juda katta farq bilan birinchi o'rinni egalladi. 

Eron 44 ta oltin, 46 ta kumush, 41 ta bronza medali bilan ikkinchi o'rinni band etgan bo'lsa, kuchli uchlikka Yaponiya para atletlari 42 ta oltin, 49 ta kumush, 59 ta bronza medali bilan yakun yasab berishdi. Bizdan avvalgi pog'onalardan Koreya Respublikasi, Hindiston, Indoneziya va Tailand terma jamoalari joy olishdi. Yigirma to'rt davlat delegaciyalari o'z vatanlariga kamida bitta oltin medal bilan qaytishdi.