O'zbekiston MTJ qachon yig'ilishi va qaysi payt Avstraliyaga ketishi haqida

Ektor Kuperning terma jamoamiz rulidagi uchinchi yig'ini yashil qitada o'tadi. Mazkur yig'in doirasida terma jamoamiz avvaliga Livan, keyinchalik esa Janubiy Koreyaga qarshi o'rtoqlik o'yinlarida maydonga tushadi.

Malum bo'lishicha, O'zbekiston terma jamoasi uchinchi yig'inga tayyorgarlikni boshlash uchun 11 noyabr kuni Toshkentda yig'iladi. Aynan shu kuni poytaxtda yig'iladigan terma jamoamiz kechki payt Avstraliyaga uchib ketishi ko'zda tutilgan. O'zbekiston terma jamoasi delegaciyasi Toshkent-Seul-Brisben yo'nalishi bo'ylab Avstraliyaga uchishi rejalashtirilgan.

O'zbekiston terma jamoasi 11 noyabr kuni kechki payt soat 21:25da Toshkentdan Seulga chamasi 6 soatdan sal oshiqroq vaqt parvoz qiladi. Keyin esa Seuldan Brisbenga taxminan 9 soatdan sal ko'proq vaqt uchishadi va seshanba kuni, yani 13 noyabrda Avstraliyaning Brisben shahriga etib borishadi.

Eslatib o'tamiz, O'zbekiston terma jamoasi Avstraliyaning Brisben shahrida 15 noyabr kuni Livanga qarshi, 20 noyabrda esa Janubiy Koreya bilan o'rtoqlik bellashuvlarida maydonga tushadi.

Ektor Kuper mazkur yig'inning kengaytirilgan tarkibida 30 nafar futbolchini chaqirishi kutilmoqda. Ammo hozircha Ektor Kuper boshchiligidagi murabbiylar shtabi uchinchi yig'inga jalb etiladigan tarkibni rasman malum qilgani yo'q.