O'zbekiston U-16 Butunjahon Olimpiadasi vice-chempioni!

Nufuzli musobaqada dunyoning 45 davlatidan jami 90 ta jamoa bosh sovrin uchun bahs olib bordi. O'zbekiston terma jamoasi musobaqada o'rtacha reyting bo'yicha 2-o'rinda qayd etilgan edi va yakunda o'ringa mos tarzda O'smirlar Olimpiadasining kumush medaliga sazovor bo'ldi. 

Xalqaro grossmeyster Saydali Yuldashev bosh murabbiyligidagi O'zbekiston terma jamoasi tarkibida xalqaro sport ustalari Humoyun Begmuratov (2435), Muhammadzohid Suyarov (2356), FIDE sport ustasi Asrorjon Omonov va ayollar xalqaro sport ustasi, yoshlar o'rtasida ikki karra jahon chempioni Afruza Hamdamova Olimpiada vice-chempionlariga aylanishdi.  

Olimpiadaning so'nggi kuni 9-tur uchrashuvlari o'tkazildi. Unda o'smirlarimiz Italiya terma jamoasiga hech qanday imkoniyat qoldirishmadi - 4:0. Birinchi doskada peshqadam FIDE 1 jamoasi FIDE 2 shaxmatchilaridan 3,5:0,5 hisobida ustun keldi. 

Barcha 9 ta uchrashuvda g'alabaga erishgan va reyting bo'yicha ham birinchi o'rinda bo'lgan FIDE 1 terma jamoasi Butunjahon O'smirlar Olimpiadasi chempionligini qo'lga kiritdi. Biz singari 14 ochko jamg'argan Qozog'iston terma jamoasi qo'shimcha ko'rsatkichlarga ko'ra bronza medaliga sazovor bo'ldi. 14 ochkoga ega Xitoy 4-o'rinni band etdi. O'zbekiston terma jamoasi Olimpiadada 7 g'alaba va 2 ta mag'lubiyat qayd etdi.