O'zbekiston va Rossiya jismoniy tarbiya va sport talimi sohasida hamkorlik qiladi

Murabbiylar hamda jismoniy tarbiya mutaxassislarining malakasini oshirish yo'nalishlarida talim samaradorligini oshirish borasida Jismoniy tarbiya va sport bo'yicha mutaxassislarni qayta tayyorlash va malakasini oshirish instituti tomonidan bir qator ishlar amalga oshirib kelinmoqda.

Xususan, yaqinda institutga A.I.Gertsen nomidagi Rossiya davlat pedagogika universiteti “Talim va rivojlanish psixologiyasi” kafedrasi hamda P.F.Lesgaft nomidagi Sankt-Peterburg milliy davlat jismoniy tarbiya, sport va salomatlik universiteti “Adaptiv sport turlari nazariyasi va metodikasi” kafedrasi professori, psixologiya fanlari nomzodi, pedagogika fanlari doktori Andrey Grecov tashrif buyurdi.

Faxriy mehmon dastlab institut o'quv xonalari, ulardagi ko'rgazmali qurollar, axborot resurs markazi bilan tanishdi. SHundan so'ng, umumtalim maktablarining jismoniy tarbiya fani o'qituvchilari, para taekwondo hamda para engil atletika guruhlari tinglovchilari bilan suhbat olib borildi. 

Bu jarayonda bolalar psixologiyasi, adaptiv sportda sportchining psixologik tayyorgarligi, ularni musobaqalarga puxta ruhiy tayyorgarlik ko'rishi borasida so'z yuritildi. 

SHuningdek, A.Grecov tinglovchilarni qiziqtirgan savollarga ham javob qaytardi. Qolaversa, institut professor-o'qituvchilari bilan ham ilmiy tadqiqot, adabiyotlar va o'quv jarayoni borasida o'zaro fikr almashildi.