O'zbekistonlik harbiylar Xalqaro armiya o'yinlarida umumjamoa hisobida 2-o'rinni egalladi + FOTO

Bu haqda Mudofaa vazirligi matbuot xizmati Kun.uz'ga malum qildi. Musobaqada birinchi o'rin Rossiya jamoasiga, uchinchi o'rin Xitoy vakillari, to'rtinchi o'rin esa Belarus jamoasiga nasib qildi.

O'zbekiston vakillari «Sodiq do'st» yo'nalishida erkaklar va ayollar jamoasi, «Harbiy-tibbiy estafeta» va «Dala oshxonasi» bellashuvlarida oltin medallarni qo'lga kiritdi.

SHuningdek, «Elbrus halqasi», «Merganlik marrasi», «Otliq marafon», «Qurolsoz usta», «Xavfsiz muhit», «Muhandislik formulasi», «Xavfsiz marshrut», «Qutb yulduzi» va «Qo'shinlar razvedka alochisi» yo'nalishida kumush medallarga sazovor bo'ldi. «Avtozirhli tank-texnika ustasi», «Ishonchli qabul», «Yo'l patruli» va «Sayan yurishi» yo'nalishlarida esa o'zbekistonliklar bronza medali sohibi bo'ldi.

Bundan tashqari, musobaqalar davomida qayd etilgan 37 ta rekord natijalarning 10 tasi O'zbekiston hisobiga yozildi.

Eslatib o'tamiz, bu yilgi «ArMI – 2021» xalqaro armiya o'yinlari 31 yo'nalishda 11 ta davlat hududida bo'lib o'tdi. Musobaqalarda 42 ta davlatning jami 277 ta jamoasi tarkibida 5000 dan ortiq harbiy xizmatchilar kuch sinashdi. O'zbekistonlik harbiylar 24 ta yo'nalishda bahslarda qatnashdi.

Musobaqaning «Harbiy-tibbiy estafeta» hamda «Dala oshxonasi» yo'nalishidagi bahslar O'zbekiston Respublikasi Mudofaa vazirligiga qarashli «Forish» poligonida bo'lib o'tdi.