O'zbekistonlik sportchi “Hoqon oltini-2021” rallisida munosib ishtirok etdi

Ushbu bosqichda “Dakar” ralli-marafonining 18 karra g'olibi – “KAMAZ-master” jamoasi ham qatnashdi. Bu yilgi “Hoqon oltini – 2021” rallisida o'zbekistonlik poygachilar ham ishtirok etdi. Jumladan, O'zbekiston Respublikasi Turizm va sport vazirligining ko'magi hamda O'zbekiston Milliy Avtomobil Klubi (O'zMAK) tomonidan taqdim etilgan xalqaro licenziya yordamida hamyurtimiz Anvar Ergashev birinchi marotaba “Hoqon oltini-2021” poygasida o'z omadini sinab ko'rdi.

Avtopoygachimiz T3 sinfiga mansub Can-Am Maverick X avtomashinasini boshqargan. Unga MARIA OPARIN jamoasining tajribali shturmani, belaruslik Andrey Rudnickiy hamrohlik qildi.

Umumiy masofasi 851,26 km ni tashkil etgan ushbu rallida ishtirokchilar 4 kun ichida belgilangan masofani bosib o'tishdi. 89 nafar ishtirokchi orasida Anvar Ergashev va uning shturmani Andrey Rudnickiy boshqaruvidagi ekipaj marraga T3 sinfida 5-o'rinda etib kelgan bo'lsa, barcha sinflar orasida 9-o'rinni egalladi.

Mana shunday ajoyib ko'rsatkich bilan hamyurtimizni muborakbod etamiz va unga kelgusi musobaqalarda omad tilaymiz.

Darvoqe, Anvar Ergashev jamoasini oldinda ralli-reydlar bo'yicha Jahon kubogining navbatdagi bosqichi – “Qozog'iston rallisi-2021” musobaqasi kutib turibdi.