O'zbekistonlik yong'in o'chiruvchilar jahon chempionatida ishtirok etishdi

Ushbu musobaqada Rossiya, Belarus, CHexiya, Ukraina, Mo'g'uliston, Ozarbayjon, Slovakiya, Bolgariya, Turkiya, Qozog'iston hamda O'zbekistondan jamoalar ishtirok etdi.

Musobaqa ishg'ol qilish narvonida o'quv minorasining 4-qavatiga ko'tarilish, 100 metrga to'siqlar osha yugurish, yong'in o'chiruvchilar estafetasi hamda yong'in o'chirish bo'yicha jangovar yoyilish turlari bo'yicha o'tkazildi.

O'zbekiston Respublikasi Ichki ishlar vazirligining Davlat yong'in xavfsizligi xizmati xodimlaridan tashkil topgan jamoa ishg'ol qilish narvonida o'quv minorasining 4-qavatiga ko'tarilish va 100 metrga to'siqlar osha yugurish bo'yicha oltinchi, yong'in o'chiruvchilar estafetasi turida to'rtinchi hamda yong'in o'chirish bo'yicha jangovar yoyilish turida to'qqizinchi o'rinlarni egalladi.

SHuningdek, ishg'ol qilish narvonida o'quv minorasining 4-qavatiga ko'tarilish turida 1 nafar hamda 100 metrga to'siqlar osha yugurish turida 4 nafar terma jamoamiz sportchilari “Sport ustasi” meyorlarini bajarishdi.

Yong'in o'chiruvchilar estafetasi turida vakillarmiz 55.77 soniya natijani qayd etib, yangi milliy rekordni o'rnatishdi (oldingisi, 2014 yilda Qozog'iston Respublikasida bo'lib o'tgan X-jahon chempionatida 56.36 soniya qayd etilgan).

Umumjamoa hisobida birinchi o'rinni Belarus, ikkinchi o'rinni Rossiya va uchinchi o'rinni Ukraina davlati vakillari egallashdi. O'zbekiston Respublikasi terma jamoasi esa kuchli beshlikka kirdi. G'olib va sovrindorlar medallar va esdalik sovg'alari bilan taqdirlandilar.