O'zPFL Superliga klublarining liboslariga oid talabni yangiladi

Liga klublarga qulaylik yaratish maqsadida reglamentning tegishli bobini tushunarli ko'rinishga keltirdi. Klub libos dizaynini ishlab chiqayotganda mazkur talablarga etibor qaratishi lozim. Fayl Liga saytining hujjatlar bo'limiga ham yuklangan.  

2025 yildan boshlab har qanday klub o'z muxlislari ko'z o'ngidagi uy uchrashuvida asosiy libosda maydonga tushishi talab etiladi. O'tgan mavsumlar davomida bu jihat murabbiylar kayfiyati yoki ularning ayrimlari amal qiladigan irimlardan kelib chiqishi oqibatida uchrashuv komissarlari qator qiyinchiliklarga duch keldi. SHundan kelib chiqib, har bir klub o'z maydonida qanday libosda harakat qilishi masalasini mavsum avvalida hal qilib olishi va uni mavsum so'ngiga qadar o'zgartirmasligi talabi reglamentdan joy oldi. Bu o'z navbatida sevimli jamoasi ishtirokidagi uy o'yiniga tashrif buyurayotgan ishqibozlar uchun ham qulaylikka olib keladi. 

SHuningdek, futbolchi o'z licenziyasida ko'rsatilgan raqamli futbolkada o'yinga qo'yiladi. Har qanday klub mazkur masalaga professional nuqtai nazardan yondashishi, o'zining U-21 va U-19 jamoalari uchun ham asosiy tarkibniki kabi liboslar taqdim etishi muhim ahamiyat kasb etadi. Bunday holatda keyinchalik asosiy tarkibga jalb etiladigan futbolchida o'z libosi hamda raqami bilan Superliga yoki Pro liga bellashuvida maydonga tushish uchun imkoniyat bo'ladi.