Para dzyudochilarimiz ilk kungi bahslarda 5 ta medal qo'lga kiritishdi FOTOGALEREYA

Dunyoning 35 davlatidan 212 nafar para dzyudochi ishtirok etayotgan nufuzli musobaqada O'zbekiston terma jamoasi azolari ham yurtimiz sharafini himoya qilishyapti. 

Quvonarlisi, musobakaning birinchi kungi bahslaridayoq dzyudochilarimiz jami 5 ta medalni qo'lga kiritishdi, shundan 2 tasi oltin! Erkaklar o'rtasidagi bahslarda -73 kg vazn toifasida ishtirok etgan Feruz Saidov, -81 kg vaznda tatamiga chiqqan Davurxon Karomatov barcha raqiblarini mag'lub etib, shoxsupaning eng yuqori pog'onasiga ko'tarilishdi. 

Ayollar o'rtasidagi bellashuvlarda esa Lobar Xurramova (-48 kg), Sevinch Salaeva ((-52 kg) va Parvina Samandarova (-57 kg) terma jamoamiz hisobiga bronza medallarini qo'shib qo'yishdi. 

Birinchi kungi bahslar yakuniga ko'ra O'zbekiston para dzyudo terma jamoasi 2 ta oltin, 3 ta bronza medali bilan umumjamoa hisobida ikkinchi o'rinni egallab turibdi. Uchtadan oltin, kumush va bronza medallarini qo'lga kiritgan Ozarbayjon terma jamoasi bu borada peshqadam. Kuchli uchlikka bittadan oltin, kumush va bronza medaliga sazovor bo'lgan Ukraina terma jamoasi yakun yasagan.