Paraosiyo o'yinlari rekordchilari Toshkent xalqaro aeroportida katta tantana bilan kutib olindi

Musobaqada o'zbekistonlik sportchilar har qachongidan ham muvaffaqiyatli ishtirok etishdi.
Kecha tunda ushbu o'yinlarda ishtirok etgan sportchilarimiz Janubiy Koreya orqali yurtimizga qaytib kelishdi.  Sportchilarimiz Toshkent xalqaro aeroportida tantanali kutib olindi. Marosimida O'zbekiston Respublikasi Prezidenti maslahatchisi Abdujabbor Abduvohidov, Bosh vazir o'rinbosari Aziz Abduhakimov, Jismoniy tarbiya va sport vaziri Dilmurod Nabiev, Milliy olimpiya qo'mitasi prezidenti Umid Ahmadjonov, sportchilarning yaqinlari, muxlislar va ommaviy axborot vositalari xodimlari ishtirok etishdi.

Tadbir davomida Bosh vazir o'rinbosari so'zga chiqar ekan, qayd etilgan yuksak natija, ko'rsatilgan jasorat uchun hukumat nomidan minnatdorchilik bildirdi. Ushbu yutuqlar zamirida ulkan mehnat yotganligini alohida takidlab o'tdi.

SHundan so'ng Miran Saxatov, Rozaxon Qo'zieva kabi sportchilarimiz, paraatletlarimizning ota-onadari so'zga chiqib, yaratilgan sharoitlar uchun minnatdorchilik bildirishdi. Sportchilarimiz navbatdagi musobaqalarda bundanda yuksak natijalarni qayd etishga vada berishdi.

SHundan so'ng tantanalar O'zbekiston Milliy paralimpiya associaciyasida davom ettirildi. Tadbirda O'zbekiston Respublikasi Bosh vaziri Abdulla Aripov ham ishtirok etdi va qo'lga kiritilgan yutuqlar bilan paralimpiyachilarimizni tabrikladi.

So'nga yig'ilganlar uchun bayramona dasturxon yozildi. Estrada xonandalarining chiqishlari esa tadbirga yanada ko'tarinki rux bag'ishladi.

Eslatib o'tamiz, ortda qolgan Paraosiyo o'yinlarida Hamyurtlarimiz tomonidan 77 ta medal, jumladan 35 ta oltin, 24 ta kumush va 18 ta bronza medallari qo'lga kiritildi. Bu orqali O'zbekiston Paraosiyo o'yinlarida medallar sifati bo'yicha ham, soni bo'yicha ham o'z rekordini yangiladi.