Parij-2024 oldidan: Bibosinov va Pangal bilan ehtimoliy janglar va boshqa "eski tanishlar". Hasanboy Do'smatovga oltin uchun kimlar halal berishi mumkin?

SHu munosabat bilan bizga Olimpiya o'yinlarida eng ko'p medal taqdim etgan boks sport turida hamyurtlarimizning vaznidagi ishtirokchilar va sportchilarimizning imkoniyatlari bilan tanishtiramiz. 

Parij Olimpiadasida boksda erkaklar 7 ta, ayollar 6 ta vazn toifasida bahslarda qatnashishadi. 

Musobaqada eng minimal -51 kg vazn toifasida yurtimiz sharafini Rio Olimpiadasi chempioni Hasanboy Do'smatov himoya qiladi.

Ushbu vazn toifasida 17 nafar sportchi qatnashadi. Unda Hasanboy uchun principial bo'lgan raqiblarni ham ko'rishimiz mumkin. 

Bir boshdan boshlaymiz. Hindistonlik Amit Pangal. Hasanboy uchun noqulay raqiblardan biri bo'lgan Amit so'nggi bir necha yil ichida xalqaro musobaqalarda ko'rinmay qolgandi. Osiyo chempionati (2019), shuningdek 2018 yilgi Osiyo o'yinlaridagi mag'lubiyat hali Do'smatovning yodidan chiqmagan bo'lsa kerak. O'z navbatida o'sha mag'lubiyatlargacha Hasanboy Amitni 2 marotaba mag'lub etishga ham ulgurgan. Demak, hisob hozircha 2:2. Albatta quragacha o'zaro jang haqida aniq tasavvurlar va taxminlarni tuzish qiyin. Biroq, Amit Hasanboy uchun ushbu vazndagi qiyin raqiblardan biri bo'lishi aniq. U yaqinda Bangkokda o'tkazilgan jahon licenzion turnirida licenziyaga ega chiqdi. 

Saken Bibossinov - qozog'istonlik charm qo'lqop ustasi bilan ham so'nggi paytlarda o'zaro principiallik yuzaga kelgan. 2021 yilgi JCHda bahsli mag'lubiyatdan so'ng, 2022 yilda Hasanboy o'zaro qarama-qarshilikdagi hisobni 1:1 ko'rinishiga olib kelgandi. Barcha Toshkentdagi JCHda uchinchi jangni kutgandi. Ammo Bibossinovning kutilmagan mag'lubiyati trilogiya ehtimolini yo'qqa chiqardi. Balki uchinchi jangni Parijdagi Olimpiadada ko'rarmiz? Qozog'istonlik sportchi Osiyo o'yinlarida Olimpiada yo'llanmasi masalasini hal qila olmagan bo'lsada, Italiyadagi licenzion musobaqada buning uddasidan chiqa oldi. 

Bilal Bennama - kelib chiqishi jazoirlik bo'lgan, hozirda Franciya sharafini himoya qiluvchi Bennama shu kungacha 3 ta JCHda sovrindor bo'lib ulgurgan. Ekaterinburg va Belgraddagi bronzadan keyin, Bennama Toshkentda finalgacha etib bordi va hal qiluvchi bahsda aynan Hasanboyga yutqazdi. Do'smatovning o'sha g'alabasi muddatidan oldin qo'lga kiritilgani hali ko'pchilikning yodidan chiqmagan bo'lsa kerak. U Evropa o'yinlaridagi oltin medal orqali Parij Olimpiadasiga etib kelgan. 

Aynan yuqorida qayd etilgan bokschilar Hasanboy Do'smatov uchun Olimpiada oltin medali yo'lida katta raqobat tug'dirishi kutilmoqda. Umuman olganda esa Olimpiya o'yinlarida oson raqiblar bo'lmaydi. 

-51 kg vazn toifasida Parij Olimpiadasida qatnashadigan bokschilar ro'yxati: 

Bilol Bennama (Franciya)

Samet Gumush (Turkiya)

Patrik CHinemba (Zambiya)

Titisan Panmot (Tailand)

Hasanboy Do'smatov (O'zbekiston)

Junior Alkantara (Dominikan)

Maykl Trindad (Braziliya)

Yusuf CHotia (Avstraliya)

Alexandro Klaro (Kuba)

Nijat Huseynov (Ozarbayjon)

Xuanma Lopes (Puerto-Riko)

Saken Bibossinov (Qozog'iston)

Rafael Lozano Serrano (Ispaniya)

Rosko Xill (AQSH)

Daniel Varela de Pina (Kabo-Verde)

Amit Pangal (Hindiston)

Omid Ahmadisafiya (Qochoqlar terma jamoasi).

Aziz To'xtamurodov tayyorladi