Peshku tuman bolalar va o'smirlar sport maktabi xodimlarining majburiy mehnatga jalb etilganligi yuzasidan rasmiy bayonot

Ushbu xabar elon qilinishi bilan O'zbekiston Respublikasi Jismoniy tarbiya va sport vazirligi topshirig'iga asosan, Buxoro viloyati Jismoniy tarbiya va sport boshqarmasi rahbari boshchiligidagi masul xodimlar mazkur holatni o'rganish maqsadida Peshku tuman bolalar va o'smirlar sport maktabiga etib bordi.

Malumki, Respublika Maxsus komissiyasi tomonidan pandemiya talablarining yumshatilishi natijasida respublikamizning barcha «yashil» hududlaridagi bolalar va o'smirlar sport maktablarida sport sekciyalari va to'garaklari faoliyati qayta tiklanmoqda.

Pandemiya davrida ikki oydan ortiq vaqt davomida karantin talablariga rioya qilish maqsadida bolalar va o'smirlar sport maktabi to'liq ish faoliyatini to'xtatgan. Endilikda sport maktabida sport sekciyalari faoliyati qayta tiklanishiga tayyorgarlik ko'rish maqsadida ichki imkoniyatdan kelib chiqqan holda maktab jamoasi maktab hududlarini obodonlashtirish uchun ixtiyoriy ravishda shanbalikka taklif etilgan.

Masullar tomonidan holat o'rganilgach, xodimlarga o'z faoliyatidan ortiqcha vazifa bergan Peshku tuman jismoniy tarbiya va sport bo'limi boshlig'i hamda tuman bolalar va o'smirlar sport maktabi direktoriga intizomiy jazo choralari qo'llanildi. SHuningdek, Buxoro viloyati Jismoniy tarbiya va sport boshqarmasi boshlig'iga bu kabi holatlar boshqa takrorlanmasligi yuzasidan qattiq ogohlantirish berildi.

O'zbekiston Respublikasi Jismoniy tarbiya va sport vazirligi trenerlar va xodimlarning o'zboshimchalik bilan majburiy mehnatga jalb etilishini oldini olish maqsadida tizimdagi barcha tashkilot va muassasalarda tushuntirish ishlarini kuchaytiradi.

Malum qilamizki, mahalliy yoshlar uchun Peshku tumani bolalar va o'smirlar sport maktabiga qarashli markaziy o'yingoh investiciya dasturi asosida qayta rekonstrukciya qilinib, joriy yilning o'zida foydalanishga topshiriladi.

Jismoniy tarbiya va sport vazirligi Kun.uz tahririyatiga bu kabi holatlar bo'yicha munosabat bildirganligi uchun minnatdorlik bildiradi va kelgusida jismoniy tarbiya va sportni aholi orasida ommalashtirish borasida hamkorlik qilishdan manfaatdor ekanligini malum qiladi.

Jismoniy tarbiya va sport vazirligi Matbuot xizmati