Peshqadam yutqazdi, Gulruhbegimda g'alaba

Ayollar o'rtasida o'tkazilayotgan musobaqaning ettinchi turida xalqaro grossmeysterimiz Gulruhbegim Tohirjonova nihoyat g'alaba qozondi. U o'tgan turda mag'lubiyat alamini totib ko'rgandi. Birinchi ayol grossmeysterimiz Nafisa Mo'minovaning singlisi bo'lgan Gulruhbegim qozog'istonlik Amina Kairbekovani mag'lub etdi. 

Kutilmaganda musobaqada yakka peshqadamlik qilayotgan Nilufar Yoqubboeva oq donalarda harakat qilganiga qaramay, yana bir grossmeysterimiz Sarvinoz Qurbonboevaga imkoniyatni boy berib qo'ydi. SHaxmatchimizning bu qoqilishidan qozog'istonlik Bibisara Assaubaeva unumli foydalanib qoldi. U vatandoshi Gulmira Dauletovani taslim etdi va peshqadamga aylanib oldi. 

Turnir jadvalida Bibisara Assaubaeva 5,5 ochko bilan birinchi o'rinni egallab turibdi. Nilufar Yoqubboeva va reyting peshqadami Gulruhbegim Tohirjonova hisobida 5 ochkodan bor. To'rt yarimtadan ochko ega bo'lib turgan qozog'istonlik Gulisxan Naxbaeva va grossmeysterimiz Sarvinoz Qurbonboeva keyingi o'rinlarni band etishgan. 

Bugun sakkizinchi turda karvonboshi Bibisara Assaubaeva hamyurti Gulisxan Naxbaevaga qarshi qora donalarda o'ynaydi. Ikkinchi taxtada Sarvinoz Qurbonboeva va Gulruhbegim Tohirjonova o'zaro to'qnash kelishadi. Bugun soat 14:00da boshlanadigan tur turnir jadvalida ko'p narsaga oydinlik kiritadi.