Poytaxtimizda yana bir nufuzli xalqaro shaxmat turniri start olmoqda

Umumiy mukofot jamg'armasi 68 700 AQSH dollarini tashkil qiluvchi musobaqa uch guruhda o'tkaziladi. "Masters" guruhida reytingi 2600 va undan yuqori bo'lgan 6 nafar xorijlik shaxmatchining ishtirok etishiga ruxsat berilgan. "CHellenjer" guruhida reytingi 2500, "Fyuchers" guruhida esa reytingi 2400 va undan yuqori 6 nafar xorijlik shaxmatchi qatnashadi.

Musobaqa 9 raundli aylanma tizimda o'tkaziladi. Har bir ishtirokchiga 90 daqiqa vaqt ajratilib, birinchi yurishdan boshlab har bir yurishga 30 soniyali qo'shimcha vaqt qo'shiladi. SHaxmatchilar 30-yurishgacha durang taklif qilishlari mumkin emas.

Kuchlilar jam bo'lgan "Masters" guruhida FIDE bayrog'i ostida qatnashadigan rossiyaliklardan Vladislav Artemev, rapid bo'yicha amaldagi jahon chempioni Volodar Murzin, armanistonliklar Xayk Martirosyan, SHant Sargsyan singari taniqli grossmeysterlar bor. Bu guruhda yurtimiz sharafini yosh grossmeysterlarimizdan Abdumalik Abdusalimov, Muhiddin Madaminov, Ortiq Nig'matov hamda yoshlar o'rtasida ikki karra jahon chempioni Afruza Hamdamova himoya qiladi.