Prague Masters. Abdusattorov yaqin taqibchisini mag'lub etdi va yana peshqadamga aylandi

Mazkur shaxmat festivali toifasiga qarab uchta guruhda tashkil etilmoqda. Kuchlilar jam bo'lgan "Masters" guruhida o'zbekistonlik grossmeysterlar — Nodirbek Abdusattorov hamda Nodirbek Yakubboev ham bosh sovrin yo'lida bahs olib bormoqda va bu borada Abdusattorovning chempionlik imkoniyati ancha yuqori bo'lib oldi.   

Quvonarlisi, sakkizinchi turda Nodirbek Abdusattorov qora donalarda o'ynadi va eng yaqin taqibchisi chexiyalik David Navarani chiroyli usulda mag'lubiyatga uchratdi. Bahs oldidan har ikki shaxmatchi 4,5 tadan ochko jamg'arib, turnir jadvalida ikkinchi va uchinchi o'rinlarni band etib turgandi. Uchrashuv durangga qarab ketayotgan bir paytda mezbon shaxmatchi blander, yani qo'pol xatoga yo'l qo'ydi va bundan Nodirbek ustalik bilan foydalanib ketdi.  

Abdusattorov o'ta muhim g'alabasi evaziga 5,5 ochko bilan yana musobaqa peshqadamiga aylanib oldi. Bunga shu kungacha karvonboshi bo'lib kelgan niderlandiyalik Yorden van Forestning oq donalarda o'ynashiga qaramay, kutilmaganda hindistonlik Aravindh CHitambaramga yutqazib qo'ygani sabab bo'ldi. 

Bu turda Nodirbek Yakubboev oq donalarda eoronlik Parham Maqsudlu bilan durangga imzo chekdi. Sakkiinchi turdan so'ng Yorden van Forest 5 ochko ikkinchi o'ringa tushdi. Bugun o'tkaziladigan so'nggi 9-turda Abdusattorovni durang natija ham chempionga aylantiradi. U bugun oq donalarda amerikalik Hans Mok Niemannga qarshi bahs olib boradi. Yakubboev qora donalarda germaniyalik Vinsent Keymer bilan hisob-kitob qiladi. Uch yarim ochkoga ega Yakubboev turnir jadvalida 7-o'ringa ko'tarildi. CHempionlikdan umidini uzmagan Yorden van Forest qora donalarda Parham Maqsudlu bilan o'ynaydi.