Prague Masters. Nodirbeklar 4-turda qanday natija qayd etishdi? Bugun Abdusattorov - Gukesh "jangi" bo'ladi

Mazkur shaxmat festivali toifasiga qarab uchta guruhda tashkil etilmoqda. Kuchlilar jam bo'lgan "Masters" guruhida o'zbekistonlik grossmeysterlar — Nodirbek Abdusattorov va Nodirbek Yakubboev ham bosh sovrin yo'lida odimlamoqda.

Kecha o'tkazilgan to'rtinchi turda grossmeysterlarimiz bitta durang va mag'lubiyat qayd etishdi. Abdusattorov qora donalarda ispaniyalik Devid Anton bilan murosaga keldi. Yakubboev esa oq donalarda o'ynab, reytingda o'zidan yuqorida borayotgan niderlandiyalik Yorden van Forestga imkoniyatni boy berib qo'ydi. 

Yakubboevning bu mag'lubiyati Abdusattorovni peshqadamlikdan tushirdi. Ochkolarini uchtaga etkazib olgan van Forest sof birinchi o'ringa ko'tarilib oldi. Nodirbek Abdusattorov 2,5 ochko bilan qo'shimcha ko'rsatkichlarga ko'ra ikkinchi o'rinni egallab turibdi. CHexiyalik David Navara hisobida ham 2,5 ochko bor. Yakubboev 2 ochko bilan beshinchi pog'onada bormoqda.   

Prague Masters 4-turida amaldagi jahon chempioni hindistonlik Gukesh Dommaradju oq donalarda David Navara bilan durangga imzo chekdi. Hindistonlik Aravindh CHitambaram germaniyalik Vinsent Keymerga yutqazib qo'ydi. Eronlik Parham Maqsudlu AQSH vakili Hans Moks Niemann bilan durangga rozi bo'ldi.

Bugun o'tkaziladigan beshinchi turda Nodirbek Abdusattorov oq donalarda jahon chempioni Gukesh Dommaradju bilan hisob-kitob qiladi. Nodirbek Yakubboev esa qora donalarda David Navara sinovidan o'tadi.