Prague Masters. Nodirbeklar qo'shhokim, Yakubboev amaldagi toj sohibi Gukesh bilan o'ynadi

Mazkur shaxmat festivali toifasiga qarab uchta guruhda tashkil etilmoqda. Kuchlilar jam bo'lgan "Masters" guruhida o'zbekistonlik grossmeysterlar — Nodirbek Abdusattorov va Nodirbek Yakubboev ham bosh sovrin yo'lida muvaffaqiyatli odimlamoqda. Har ikki shaxmatchimiz birinchi turda g'alabaga erishgandi.  

Kecha o'tkazilgan ikkinchi turda grossmeysterlarimiz nomdor raqiblariga qarshi qora donalarda harakat qilishdi va yakunda durangga imzo chekishdi. Nodirbek Abdusattorov eronlik Parham Maqsudlu bilan murosaga keldi. Nodirbek Yakubboev esa amaldagi jahon toji sohibi, hindistonlik Gukesh Dommaradju bilan durang qayd etdi. 

Prague Masters 2-turida ispaniyalik Devid Anton niderlandiyalik Yorden van Forestni, 1-turda Abdusattorovga yutqazgan hindistonlik Aravindh CHitambaram esa amerikalik Hans Mok Niemannni mag'lubiyatga uchratdi. Qolgan partiyalarda tomonla murosaga kelishdi. 

Ikkinchi turdan so'ng turnir jadvalida Nodirbek Abdusattorov, Nodirbek Yakubboev va chexiyalik David Navara 1,5 ochkodan jamg'arib, peshqadamlik qilishyapti. Ikki Nodirbek qo'shimcha ko'rsatkichlarga ko'ra birinchi va ikkinchi o'rinlarni band etgan. 

Bugun 3-turda Nodirbek Abdusattorov oq donalarda germaniyalik Vinsent Keymerga, Nodirbek Yakubboev esa amerikalik Hans Mok Niemannga qarshi o'ynaydi.