Prezident Kubogi. Bugun 3-turda o'zbek derbisiga guvoh bo'lamiz

Dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun bahs olib borishyapti. Bugun turnirda 3-tur uchrashuvlari o'tkaziladi. Kuchlilar jam bo'lgan A guruhining birinchi doskasida Nodirbek Abdusattorov (2777) qora donalarda yana bir istedodli grossmeysterimiz Muhiddin Madaminov (2501)ga qarshi bahs olib boradi. Har ikki shaxmatchi ham dastlabki ikki turda g'alabaga erishgan. 

Ikki g'alabaga ega Javohir Sindarov (2682) oq donalarda FIDE bayrog'i ostida qatnashayotgan Mixail Nikitenko (2490) bilan hisob-kitob qiladi. Ikkinchi raqamli shaxmatchi Parham Maqsudlu (Eron, 2712)ni mag'lub eta olgan yosh shaxmatchimiz Ortiq Nig'matov (2419) esa 3-turda hindistonlik Pranesh (2580) bilan to'qnash keladi. 

Jami 13 nafar shaxmatchi 3-tur oldidan yuz foizlik natijaga erishib turibdi. Ularning 5 nafari hamyurtlarimiz hisoblanadi. Ikki g'alabaga erishgan Ulug'bek Tillaev (2303) bugun 1,5 ochkoga ega bo'lib turgan grossmeysterimiz SHamsiddin Vohidov (2681)ga qarshi qora donalarda o'ynaydi.