Prezident Kubogi. Ikki Nodirbek g'alaba bilan boshladi. Qolgan shaxmatchilarimizda qanday natija? + FOTO

To'qqiz kun davomida dunyoning ko'zga ko'ringan grossmeysterlari mukofot jamg'armasi 75 000 AQSH dollarini tashkil etuvchi Prezident Kubogi musobaqasi bosh sovrini uchun o'zaro bahs olib borishadi. Ishtirokchilar FIDE reytingidagi o'rinlariga qarab A va V guruhlarida dona surishyapti.  

Kuchlilar jam bo'lgan A guruhi bahslarida yurtimiz sharafini Nodirbek Abdusattorov, Javohir Sindarov, SHamsiddin Vohidov, Nodirbek Yakubboev singari taniqli grossmeysterlarimiz himoya qilishmoqda. Abdusattorov (2777) xalqaro turnirning birinchi raqamli ishtirokchisi sifatida saralangan bo'lib, 1-turda qora donalarda hindistonlik Sambit Panda (2380)ni mag'lubiyatga uchratdi. 

Ikkinchi raqamli shaxmatchi Parham Maqsudlu (Eron, 2712) oq donalarda xitoylik Jang Zijidan ustun keldi. Uning hamyurti Amin Tabatabayi uchinchi raqam ostida tasniflangan bo'lib, qozog'istonlik Meruert Kameledinova bilan murosaga keldi.    

Nodirbek Yakubboev qora donalarda harakat qilganiga qaramay, qirg'izistonlik Melis Mamatovni taslim etdi. Javohir Sindarov rossiyalik Ekaterina Golcevani mag'lubiyatga uchratdi. SHamsiddin Vohidov hindistonlik Vaz Etan bilan durang o'ynadi.