Prezident Kubogida ikki shaxmatchimiz qo'shhokim bo'lib oldi

Musobaqada dunyoning turli mamlakatlaridan kelgan grossmeysterlar bosh sovrin uchun bahs olib borishyapti. Hindistonlik Nihal Sarin (2701) turnirda birinchi raqam ostida saralan. U kecha o'tkazilgan 4-turda rossiyalik Aleksandr Grishuk bilan durang o'ynadi. Bu turda birgina Yuriy Kuzubov g'alabaga erishdi. Ukrainalik grossmeyster germaniyalik Frederik Svenni mag'lubiyatga uchratdi.

To'rtinchi turning qolgan barcha partiyalarida tomonlar murosaga kelishdi. Musobaqada beshinchi raqam ostida saralangan hamyurtimiz SHamsiddin Vohidov (2641) reytingda o'zidan yuqorida borayotgan armanistonlik SHant Sargsyan bilan murosaga keldi. Grossmeysterimiz Abdimalik Abdisalimov (2561) ham o'zidan yuqorida turgan franciyalik Maksim Lagarde (2608 ) bilan durang natija qayd etdi. Yana bir yosh grossmeysterimiz Muhiddin Madaminov (2552) eronlik raqibi Daneshvar Bardiya (2600) bilan durang o'ynadi. 

Prezident Kubogining 4-turidan keyin SHamsiddin Vohidov, Muhiddin Madaminov va Nihal Sarin 3 ochkodan jamg'arib, turnir jadvalida qo'shhokimlik qilishyapti. Qo'shimcha koeficentlarga ko'ra SHamsiddin hamda Muhiddin birinchi va ikkinchi o'rinlarni band etgan. 

Bugun 5-turda o'zbek derbisiga guvoh bo'lamiz. Ikki peshqadam SHamsiddin Vohidov va Muhiddin Madaminov o'zaro to'qnash keladi. SHamsiddin bugun oq donalarda o'ynaydi.  Abdimalik Abdisalimov esa Daneshvar Bardiyaga qarshi qora donalarda bahs olib boradi.