Prezident Kubogining 2-tur barcha partiyalari bir xil natija bilan yakunlandi

Musobaqada dunyoning turli mamlakatlaridan kelgan grossmeysterlar bosh sovrin uchun bahs olib borishyapti. Hindistonlik Nihal Sarin (2701) turnirda birinchi raqam ostida saralangan bo'lib, u 1-turda germaniyalik Frederik Svenni mag'lubiyatga uchratgandi.

Musobaqada beshinchi raqam ostida saralangan hamyurtimiz SHamsiddin Vohidov (2641) ham o'z ishtirokini g'alaba bilan boshlab olgandi. Grossmeysterimiz franciyalik Maksim Lagarde (2608 )ni oq donalarda taslim etgan edi. 

Yana bir yosh grossmeysterimiz Muhiddin Madaminov (2552) ham ilk turda zafar quchgandi. U blic bo'yicha uch karra jahon chempioni, turnirning uchinchi saralangan shaxmatchisi, rossiyalik Aleksandr Grishukdan ustun kelgandi. Grossmeysterimiz Abdimalik Abdisalimov (2561) esa ikkinchi saralangan ishtirokchi, armanistonlik SHant Sargsyan (2665)ga imkoniyatni boy bergan edi. 

Prezident Kubogining 2-tur barcha uchrashuvlari durang natija bilan yakunlandi. SHamsiddin Vohidov qora donalarda ukrainalik grossmeyster Yuriy Kuzubov, Muhiddin Madaminov qora donalarda SHant Sargsyan, Abdimalik Abdisalimov esa oq donalarda Frederik Sven bilan murosaga keldi. 

Uchinchi tur oldidan turnir jadvalida SHant Sargsyan, Muhiddin Madaminov, SHamsiddin Vohidov, Nihal Sarin va eronlik Daneshvar Bardiya 1,5 ochkodan jamg'arib, peshqadamlik qilishyapti. Qolgan barcha ishtirokchilar hisobida 0,5 ochkodan bor. 

Bugun 3-turda o'zbek derbisiga guvoh bo'lamiz. Muhiddin Madaminov oq donalarda Abdimalik Abdisalimovga qarshi dona suradi. SHamsiddin Vohidov esa blic bo'yicha uch karra jahon chempioni Aleksandr Grishuk bilan o'ynaydi.