Pro liga. Bugun Farg'onada chempionlik o'yini!

Farg'onadagi "Istiqlol" stadionida peshqadam "Neftchi" ikkinchi o'rindagi "Turon"ni qabul qiladi.

"Neftchi" birinchi o'rinda qolishi uchun g'alaba yoki durang kifoya qiladi. "Turon" esa birinchi o'ringa chiqishi uchun faqat g'alaba zarur.

Eslatib o'tamiz, Pro ligada birinchi o'rinni olgan klub 2021 yilgi Superligaga yo'llanmani qo'lga kiritadi. Ikkinchi o'rin sohibi esa Superligada 13-o'rinni egallagan klub bilan pley-off bahsini o'z maydonida o'tkazadi.

Bu mavsum ushbu klublar hozirga qadar o'zaro uchta o'yin o'tkazishdi. 7-tur doirasida o'tgan "Turon" - "Neftchi" uchrashuvida 1:1 hisobi qayd etilgan. Mehmonlar hujumchisi Dostonbek Toshmatovning goliga mezbonlar safida Asilbek Qayumov javob bergandi.

14-tur doirasida kechgan "Neftchi" - "Turon" o'yini ham 1:1 hisobi bilan tugagan. Bu safar yaypanliklar vakili Sunnat Ermatov hisobni ochgan, so'nggi daqiqalarda Sanjar Zokirov hisobni tenglashtirgandi.

Ikkinchi bosqich doirasidagi "Turon" - "Neftchi" bahsida mehmonlar zafar quchishgan. Mirjalol Nematov va Dostonbek Toshmatovning gollariga mezbonlar javob bera olishmagan - 0:2.

Pro liga, 20-tur.
NEFTCHI – TURON
1 dekabr 2020 yil. Farg'ona. "Istiqlol" stadioni. 14:00 (Futbol TV LIVE)
Hakamlar: SHavkat Nasibullaev, Rishat Nugmanov, Doniyor Saylavov
Nazoratchi: Igor Nexochin
Komissar: SHohruh Said.