Professional bokschimiz Jahongir Rasulov navbatdagi jangini Avstraliyada o'tkazadi

Yarimo'rta vazn toifasida o'zbekistonlik professional boks ustasi, 26 yoshli Jahongir Rasulov faoliyatidagi oltinchi jangini o'tkazish arafasida.

U 22 aprel kuni Avstraliyaning Melburn shahrida joylashgan Kilda Town Hall arenasida tashkillashtirilayotgan boks oqshomining markaziy jangida ringga ko'tariladi. Hamyurtimizga filippinlik Jan Rik Karsedo raqibliq qiladi. Mazkur jang 8 raund etib belgilangan.

Jahongir Rasulov professional boksda beshta jang o'tkazib, ularning barchasida muddatidan avval g'alaba qozonganini takidlash lozim. U o'zining so'nggi jangini mart oyida Toshkentda o'tkazgan edi. Malavilik Xannok Piridan ustun kelgan Rasulov o'shanda WBC mintaqaviy kamariga ega chiqqan edi.

Jan Rik Karsedo uchun esa bu prof-boksdagi 11-jang hisoblanadi. U janglarining to'qqiztasida g'alaba qozongan (9 KO), bitta jangda mag'lubiyat alamini totib ko'rgan.