Qatar Masters. Abdusattorovda yana g'alaba, Yakubboev va Vohidov peshqadamlarga yaqinlashdi (Barcha natijalar)

Mukofot jamg'armasi 94 200 AQSH dollarini tashkil qiluvchi Qatar Masters turnirida jami 53 nafar o'zbekistonlik shaxmatchi A va V guruhida bahs olib boryapti. Kuchlilar jam bo'lgan Open turnirida 15 nafar shaxmatchimiz sovrinli o'rinlar uchun kurashyapti. 

Turnirda ikkinchi raqam ostida tasniflangan Nodirbek Abdusattorov (2777) ketma-ket ikkinchi g'alabasini qo'lga kiritdi. U 4-turda qora donalarda indoneziyalik Oliviya Kiolbasani mag'lubiyatga uchratdi. Birinchi turda yutqazgan yana bir grossmeysterimiz Nodirbek Yakubboev (2668) ketma-ket uchinchi g'alabasini tantana qildi. U oq donalarda hindistonlik Krishna Gutamdan ustun keldi. 

SHamsiddin Vohidov (2681) ham bu turda zafar quchdi. Grossmeysterimiz oq donalarda mo'g'ulistonlik Gan-Erdene Sugarni engdi. Yoshlar o'rtasida jahon chempioni Afruza Hamdamova (2354) o'zbek derbisida Saidakbar Saydaliev bilan murosaga keldi. Yosh grossmeysterimiz Abdumalik Abdusalimov (2536) amirlik grossmeyster Salem Saleh bilan durang qayd etdi va ochkolarini 3 taga etkazib oldi. 

Turnirning birinchi tartib raqamli shaxmatchisi hindistonlik Arjun Ergaisi (2801) 4-turda vatandoshi Pranesh (2582) bilan durang o'ynadi. Eronlik Parham Maqsudlu (2703) oq donalarda harakat qilganiga qaramay, yana bir yosh grossmeysterimiz Muhiddin Madaminovga qarshi bahsda mag'lubiyatdan chiqib ketdi va durangga erishdi. Toshkentdagi "Prezident Kubogi" turnir g'olibi Nihal Sarin (2676) Ivan Zemlyanskiy (2543) bilan murosaga keldi va qatorasiga ikkinchi bor ochko yo'qotdi.  

To'rtinchi turda Ortiq Nig'matov (2447) vetnamlik grossmeyster Nguen Ngok (2646) bilan durang qayd etdi. Kuchlilar guruhida qatnashayotgan hamyurtlarimizdan Muhammadzohid Suyarov, Bahrom Baxrillaev, Asrorjon Omonov, Muhammadali Abdurahmonov raqiblari bilan durang o'ynashdi. Humoyun Begmuratov qora donalarda harakat qilishiga qaramay, mo'g'listonlik Munguntul Bathuyagni taslim etdi. Almas Rahmatullaev va Nilufar Yakubboeva bu turda mag'lubiyat alamini totib ko'rishdi. Nilufar barcha uchrashuvlarda raqiblariga yutqazgan. 

To'rtinchi turga kelib ochko yo'qotmagan nafar shaxmatchi qolmadi. Yuz foizlik ko'rsatkich bilan kelgan 4 shaxmatchi 4-turda o'zaro uchrashuvda durang qayd etishdi. Beshinchi tur oldidan 6 nafar ishtirokchi 3,5 tadan ochko jamg'arib, peshqadamlar safida borishyapti. Rossiyalik Andrey Esipenko qo'shimcha koeficentlarga ko'ra 1-o'rinni band etgan. O'n sakkiz nafar shaxmatchi 3 ochkodan jamg'argan. Ular orasida hamyurtlarimiz SHamsiddin Vohidov, Abdumalik Abdusalimov va Nodirbek Yakubboev ham bor. Ular qo'shimcha ko'rsatkichlarga ko'ra mos ravishda 17, 19 va 20-o'rinlarni egallab turishibdi. 

Ochkolarini 2,5 taga etkazib olgan Nodirbek Abdusattorov 86-pog'onadan 49-o'ringa ko'tarilib oldi. 25-pog'onadagi eronlik Mahdavi Reza hisobida ham Nodirbek singari 2,5 ochko bor. Abdusattorov 1-turda aynan Mahdaviga yutqazib qo'ygan edi. Bugun 5-turda Nodirbek oq donalarda hindistonlik Ayush SHarma (2466)ga qarshi bahs olib boradi. SHamsiddin Vohidov va Abdumalik Abdusalimov qora donalarda mos ravishda hindistonlik grossmeysterlar Pranesh hamda Nihal Sarin bilan hisob-kitob qilishadi. Yakubboev esa italiyalik grossmeyster Lorenco Lodikiga qarshi bahs olib boradi.