Qatar Masters. Nodirbek Abdusattorovda nihoyat g'alaba. Qolganlardachi?

Mukofot jamg'armasi 94 200 AQSH dollarini tashkil qiluvchi Qatar Masters turnirida jami 53 nafar o'zbekistonlik shaxmatchi A va V guruhida bahs olib boryapti. Kuchlilar jam bo'lgan Open turnirida 15 nafar shaxmatchimiz sovrinli o'rinlar uchun kurashyapti. 

Turnirda ikkinchi raqam ostida tasniflangan Nodirbek Abdusattorov (2777) 3-turga kelib ilk g'alabasiga erishdi. Avvaliga mag'lubiyat, keyin durang qayd etgan grossmeysterimiz 3-turda oq donalarda Indoneziya vakili Alisya Slivikani mag'lubiyatga uchratdi. Birinchi turda yutqazgan yana bir grossmeysterimiz Nodirbek Yakubboev (2668) ketma-ket ikkinchi g'alabasini tantana qildi. U qora donalarda eronlik Artin Ashrafdan ustun keldi. 

SHamsiddin Vohidov (2681) qora donalarda hindistonlik Aditya Dhingra (2448) bilan durang qayd etdi. Yoshlar o'rtasida jahon chempioni Afruza Hamdamova (2354) bir g'alaba va durangdan keyin 3-turda mag'lubiyat alamini totib ko'rdi. U qozog'istonlik grossmeyster Murtaz Kajgaleev (2488)ga yutqazib qo'ydi.     

Turnirning birinchi tartib raqamli shaxmatchisi hindistonlik Arjun Ergaisi (2801) 1-turda hamyurtimiz Muhammadali Abdurahmonov (2395)ni enggandi. Kecha u yana bir yosh shaxmatchimiz Saidakbar Saydaliev (2473)dan ustun keldi. Eronlik Parham Maqsudlu (2703) indoneziyalik Monika Sokoni taslim etdi. Toshkentdagi xalqaro turnir g'olibi Nihal Sarin (2676) hamyurti Sankapl Gupta (2545) bilan murosaga keldi va ilk bor ochko yo'qotdi.  

Ikkinchi turda yosh grossmeysterlarimizdan Muhiddin Madaminov (2501) o'zbek derbisida Ortiq Nig'matov (2447) bilan durang qayd etdi. Abdumalik Abdusalimov (2536) qora donalarda o'ynashiga qaramay, xitoylik Xengyi Juni mag'lubiyatga uchratdi va ochkolarini 2,5 taga etkazib oldi. 

Kuchlilar guruhida qatnashayotgan hamyurtlarimizdan Muhammadzohid Suyarov va Muhammadali Abdurahmonov 3-turda raqiblari bilan durang o'ynadi. Humoyun Begmuratov BAA vakili Omran Al Hosaniga yutqazdi. Almas Rahmatullaev va Bahrom Baxrillaev g'alabaga erishdi. Nilufar Yakubboeva o'zbek derbisida Asrorjon Omonovga imkoniyatni boy berdi. Bu Nilufurning ketma-ket uchinchi mag'lubiyati, Asrorjon ilk ochkosi bo'ldi.  

Uchinchi turdan so'ng ochko yo'qotmagan 4 nafar shaxmatchi qoldi. Ular bugun 4-turda o'zaro uchrashuvda kim kuchli degan savolga javob topishadi. O'n to'rt nafar shaxmatchi hisobida 2,5 ochkodan bor. Hamyurtlarimiz orasida eng yuqori o'rin hozircha Abdumalik Abdusalimovga tegishli. U 2,5 ochko bilan qo'shimcha ko'rsatkichlarga ko'ra 18-o'rinni egallab turibdi. Bir yarim ochkoga ega Nodirbek Abdusattorov 123-pog'onadan 86-o'ringa ko'tarilib oldi. 49-pog'onadagi shaxmatchida ham Nodirbek singari 1,5 ochko bor.