"Qonaev Cup 2025". SHaxmatchilarimiz 7-turda qanday natija qayd etishdi?

Uchta guruhda tashkil etilayotgan musobaqada 19 davlatdan jami 268 nafar shaxmatchi sovrinli o'rinlar uchun bahs olib bormoqda. Ushbu turnirda O'zbekiston sharafini 5 nafar shaxmatchimiz himoya qilyapti. 

Mukofot jamg'armasi 78 000 dollarni tashkil etuvchi "Masters" guruhida Muhammadzohid Suyarov (2488) va Humoyun Begmuratov (2466), 15 000 dollar sovrin puliga ega "Challengers" guruhida esa grossmeysterimiz Aleksey Barsov (2323), shuningdek Miraziz Matyakubov (2260) hamda Azamat Daurimbetov (2199) o'z omadini sinab ko'rmoqda.

Afsuski, 7-turda Muhammadzohid Suyarov ketma-ket g'alabalardan keyin mag'lubiyatga uchradi. U qora donalarda armanistonlik xalqaro grossmeyster Aram Hakobyan (2625)ga imkoniyatni boy berib qo'ydi. Ochkolari 4 taliga qolgan Suyarov qo'shimcha ko'rsatkichlarga ko'ra 16-o'rindan 26-pog'onaga tushib ketdi. O'n ettinchi o'rindan joy olgan qozog'istonlik Daniyal Sapenov hisobida ham 4 ochko bor. 

Humoyun Begmuratov bu turda qora donalarda o'ynadi. Yosh shaxmatchimiz qozog'istonlik Erlan Tleuxanov bilan murosaga keldi. Humoyun 3 ochko bilan hamon 48-pog'onadan 42-o'ringa ko'tarilib oldi. Bugun 8-turda Muhammadzohid Suyarov oq donalarda FIDE bayrog'i ostida harakat qilayotgan belaruslik grossmeyster Sergey Azarov (2570)ga qarshi bahs olib boradi. Begmuratov esa qozog'istonlik ayol grossmeyster Alua Nurmanga qarshi oq donalarda o'ynaydi. 

"Challengers" guruhida qatnashayotgan uch nafar shaxmatchimiz 7-turda uch xil natija qayd etishdi. Tajribali grossmeysterimiz Aleksey Barsov oq donalarda o'ynaganiga qaramay, qozog'istonlik Edil Kabilbek (2003)ni mag'lub eta olmadi. Uchrashuv durang natija bilan yakunlandi. Miraziz Matyakubov oq donalarda qozog'istonlik Adil Tkachayovga imkoniyatni boy berib qo'ydi. Azamat Daurimbetov esa aksincha, qora donalarda mezbonlarning yana bir shaxmatchisi Arlen Abdrashevni mag'lubiyatga uchratdi. 

Sakkizinchi tur oldidan Azamat Daurimbetov 5,5 ochko bilan qo'shimcha ko'rsatkichlarga ko'ra 9-pog'onadan 4-o'ringa ko'tarilib oldi. Ikkinchi o'rindagi qozog'istonlik Abdilxayr Abilmansur hisobida ham 5,5 ochko bor. FIDE bayrog'i ostida o'ynayotgan Konstantin Kornienko 6 ochko bilan yakka peshqadam bo'lib turibdi. Aleksey Barsov 5 ochko bilan o'z o'rnini saqlab qoldi - 10-o'rin. Miraziz Matyakubov 4 ochko bilan 12-o'rindan 20-pog'onaga tushib ketdi. 

Bugun 8-turda Azamat Daurimbetov oq donalarda o'zi singari 5,5 ochkoga ega qozog'istonlik Alibek Igambergenovga qarshi bahs olib boradi. Aleksey Barsov qora donalarda yana bir mezbon shaxmatchi Adil Tkachyovga qarshi o'ynaydi. Miraziz Matyakubov mo'g'ulistonlik Xuslen Erdenbayar bilan hisob-kitob qiladi.