"Qonaev Cup 2025". Suyarovda yana g'alaba va boshqa natijalar

Uchta guruhda tashkil etilayotgan musobaqada 19 davlatdan jami 268 nafar shaxmatchi sovrinli o'rinlar uchun bahs olib bormoqda. Ushbu turnirda O'zbekiston sharafini 5 nafar shaxmatchimiz himoya qilyapti. 

Mukofot jamg'armasi 78 000 dollarni tashkil etuvchi "Masters" guruhida Muhammadzohid Suyarov (2488) va Humoyun Begmuratov (2466), 15 000 dollar sovrin puliga ega "Challengers" guruhida esa grossmeysterimiz Aleksey Barsov (2323), shuningdek Miraziz Matyakubov (2260) hamda Azamat Daurimbetov (2199) o'z omadini sinab ko'rmoqda.

Oltinchi turda Muhammadzohid Suyarov oq donalarda qozog'istonlik Ergali Suleymanni mag'lubiyatga uchratdi. Ochkolarini 4 taga etkazib olgan Suyarov qo'shimcha ko'rsatkichlarga ko'ra 25-pog'onadan 16-o'ringa ko'tarilib oldi. Beshinchi o'rindan joy olgan hindistonlik Ayush SHarma hisobida ham 4 ochko bor. 

Humoyun Begmuratov bu turda oq donalarda o'ynadi. Yosh shaxmatchimiz amerikalik Maksimiliyan Lu bilan murosaga keldi. Humoyun 2,5 ochko bilan hamon 48-pog'onani band etib turibdi. Bugun 7-turda Muhammadzohid Suyarov qora donalarda armanistonlik grossmeyster Aram Hakobyanga qarshi bahs olib boradi. Begmuratov esa qozog'istonlik Erlan Tleuxanovga qarshi qora donalarda o'ynaydi. 

"Challengers" guruhida qatnashayotgan uch nafar shaxmatchimizning bari 5-turda g'alabaga erishgandi. Oltinchi turda esa ular qimmatli ochkolarni yo'qotishdi. Tajribali grossmeysterimiz Aleksey Barsov qora donalarda qirg'izistonlik Nurgazi Jinbekov bilan durang qayd etdi. Miraziz Matyakubov oq donalarda o'ynaganiga qaramay, qozog'istonlik Abilmansur Abdilxayirga imkoniyatni boy berib qo'ydi. Azamat Daurimbetov esa mezbonlarning yana bir shaxmatchisi Dinmuhammed Tulendinov bilan murosaga keldi. 

Ettinchi tur oldidan Azamat Daurimbetov 4,5 ochko bilan qo'shimcha ko'rsatkichlarga ko'ra 9-o'rinni egallab turibdi. Beshinchi o'rindagi Dinmuhammed Tulendinov hisobida ham 4,5 ochko bor. Aleksey Barsov 4,5 ochko bilan 10-o'rinni band etgan. Miraziz Matyakubov 4 ochko bilan 12-o'ringa pastladi. To'rt nafar ishtirokchi 5 tadan ochko jamg'arib, "Challengers" guruhida karvonboshilik qilmoqda. Qozog'istonlik Abilmansur Abdilxayir qo'shimcha koeficentlarga ko'ra peshqadam bo'lib turibdi.