Qosimjonov Angliyadagi turnirda, amaldagi jahon chempioni ham

Dunyoning eng kuchli grossmeysterlari ishtirokida o'tayotgan open-turnirda hamyurtimiz, 17-jahon chempioni Rustam Qosimjonov ham o'z imkoniyatini sinovdan o'tkazyapti. SHveycarcha tizimda o'tayotgan ushbu musobaqada jami 159 nafar shaxmatchi dona suryapti.

Ular orasida amaldagi jahon chempioni norvegiyalik Magnus Karlsen, sobiq jahon chempioni hindistonlik Vishvanatan Anand, umuman olganda, jahon reytingining yuqori elitasidagi barcha shaxmat yulduzlari bor.

Turnir g'olibi 50 000 funt sterlingga ega bo'ladi. Ikkinchi o'rin sohibi 25 000, uchinchi o'rinni egallagan shaxmatchi 12 500 funt sterling miqdoridagi mukofot pulini qo'lga kiritadi.

Rustam Qosimjonov ketma-ket 3 ta partiyada raqiblarini mag'lubiyatga uchratdi. To'rtinchi partiyada amaldagi jahon chempioni Magnus Karlsen bilan durang o'ynadi. Kecha o'tkazilgan 7-partiya uchrashuvida Qosimjonov franciyalik grossmeyster Laurent Fressine bilan murosaga keldi.

Hozircha hamyurtimiz 7 imkoniyatdan 5 ochko jamg'argan. Peshqadam Magnus Karlsen hisobida 6 ochko bor. Demak, bitta g'alaba turnir jadvalida katta o'zgarishlarga sabab bo'lishi mumkin.

7-tur natijalari: Karlsen – Vidit durang; Karuana – Jons 1-0, Vagner – Nakamura 0-1, Baciashvili – Elyanov 0-1, Zatonskix – Sutovskiy 0-1, Lenderman – Anand, Adams – L’Ami, Qosimjonov – Fressine, Rapport – Svapnil, Movsesyan – Sokolov partiyalari durang bilan yakunlandi.

7-turdan keyingi vaziyat: 1. M.Karlsen (Norvegiya) – 6; 2-6. F.Karuana, X.Nakamura (ikkisi ham AQSH), P.Elyanov (Ukraina), S.Vidit (Hindiston), E.Sutovskiy (Isroil) – 5,5; 7-21. V.Anand, S.Svapnil (ikkisi ham Hindiston), M.Adams (Angliya), Rustam Qosimjonov (O'zbekiston), R.Rapport (Vengriya), S.Movsesyan (Armaniston), Xou Ifan (Xitoy), V.Akobyan, A.Lenderman (ikkisi ham AQSH), L.Fressine (Franciya), N.Grandelius (SHveciya), E.L’Ami, I.Sokolov (ikkisi ham Gollandiya), S.Bogner (SHveycariya), F.Bindrix (Germaniya) – 5.

8-tur juftliklari: Karuana – Karlsen, Nakamura – Sutovskiy, Vidit – Elyanov, Fressine – Anand, Grandelius – Adams, L’Ami – Qosimjonov, Sokolov – Rapport, Bindrix – Movsesyan, Xou Ifan – Bogner, Akobyan – Lenderman, Svapnil – SHort, Kramnik – Seturaman.