Qosimjonovda g'alaba, 15 yoshli Abdusattorov kuchli grossmeysterni mag'lub etdi

Kecha kunning ikkinchi yarmida musobaqaning ettinchi  tur uchrashuvlari o'tkazildi. Turnirda birinchi raqam ostida saralangan Rustam Qosimjonov ushbu turda qora donalarda harakat qildi. 17-jahon chempioni qozog'istonlik xalqaro grossmeyster Anuar Ismagambetovni mag'lubiyatga uchratdi. 

15 yoshli xalqaro grossmeyterimiz Nodirbek Abdusattorov ham ajoyib g'alabaga erishdi. U qozog'istonlik grossmeyster Pyotr Kostenkoni taslim etdi. Turnir jadvali peshqadami qozog'istonlik Rinat Jumaboev hamyurtimiz Nodirbek Yoqubboevdan ustun keldi va karvonboshiligini mustahkamladi. 

Yana bir yosh grossmeysterimiz Jahongir Vohidov oq donalarda o'ynashiga qaramay, qozog'istonlik grossmeyster Murtaz Kajgaleevga imkoniyatni boy berib qo'ydi. Tajribali grossmeysterimiz Marat Jumaev esa shogirdi Ortiq Nig'matovni engdi. 

Ettinchi turdan so'ng musobaqa jadvalida Rinat Jumaboev 5,5 ochko bilan yakka peshqadam bo'lib turibdi. Rustam Qosimjonov va Nodirbek Abdusattorov 5 ochko bilan kuchli uchlikdan joy olishgan. Nikita Xoroshev, Murtaz Kajgaleev va Marat Jumaev hisobida 4 tadan ochko bor. 

Bugun 8-turda Abdusattorov oq donalarda Rinat Jumaboevga qarshi harakat qiladi. Agar 15 yoshli grossmeysterimiz ushbu bahsda g'alaba qozona olsa, u holda chempionlik uchun juda katta qadam tashlaydi. Rustam Qosimjonov esa bu turda Nikita Xoroshevni sinovdan o'tkazadi.