Qutbillo Teshaboev: Yaratilgan keng imkoniyatlardan minnatdormiz

Ana shunday yuqori natijalarni qayt etish yo'lida tinimsiz mehnat qilayotgan sportchilarimizdan biri Qutbillo Teshaboevdir.

Andijonlik Qutbillo olti yoshida amakisi Xudoyorbek Teshaboev qo'l ostida stol tennisi sirlarini o'rgana boshlaydi va mazkur sport turiga mehr qo'yadi.
O'zbekiston stol tennisi federaciyasi matbuot kotibi Nig'monxo'ja Nozimov bilan bo'lgan suhbatda, Qutbillo Teshaboev ayni kunlarda nimalar bilan shug'ullanayotgani, sportchilik faoliyati haqida to'xtalib o'tdi.

– Mazkur sport turi bilan shug'ullanishni maslahat bergan amakimdan minnatdorman. Stol tennis bilan shug'ullanish davomida sog'lom bo'lib voyaga etdim va hech qaerda o'xshashi yo'q bo'lgan uch bosqichli tizimning “Umid nihollari” va “Barkamol avlod” musobaqalarida ishtirok etish sharafiga muyassar bo'ldim.
Sport bilan shug'ullanishim mobaynida mamlakat miqyosidagi musobaqalarda o'z tajribamni oshirib kelmoqdaman. Jumladan, o'tgan yili mamlakat chempionati finalida hamyurtimiz Zohid Kenjaevga qarshi o'tgan o'yin men uchun unutilmas bo'ldi. Mazkur bahsda menga biroz omad etishmadi va kutilmaganda 3:2 hisobida mag'lubiyatga uchradim. Garchi mag'lubiyatga uchragan bo'lsam-da, o'z xato va kamchiliklarimni bilib olishga muyassar bo'ldim.

Mamlakatimizda biz sportchilarga qaratilayotgan etibor va yaratilgan shart-sharoitlar uchun Prezidentimizga, Milliy olimpiya qo'mitasi va mamlakatimiz stol tennis federaciyasiga minnatdorchilik bildiraman.

O'zbekiston stol tennisi federaciyasi matbuot xizmati