Rameshbabu chempion bo'lgan Superbet Chess Classic Romania turnirida Abdusattorov nechanchi o'rinni egalladi?

Grand Chess Tour 2025 tasnifiga kiruvchi — Superbet Chess Classic Romania turnirining mukofot jamg'armasi 350 000 AQSH dollarini tashkil qildi. Dunyoning ko'zga ko'ringan grossmeysterlari qatorida bosh sovrin uchun hamyurtimiz Nodirbek Abdusattorov ham kurash olib bordi. 

Grossmeysterimiz kecha o'tkazilgan so'nggi 9-tur uchrashuvida amerikalik Uesli Soga qarshi oq donalarda o'ynadi va durang natija qayd etdi. Bu bilan Nodirbek 9 imkoniyatdan 4,5 ochko jamg'arib, musobaqani kuchli beshlikda yakunladi. Abdusattorov 10 nafar ishtirokchi orasida reyting bo'yicha 7-raqam ostida tasniflangan edi. 

Musobaqa chempionligi Rameshbabu Praggnanandhaga nasib etdi. Hindistonlik grossmeyster turnirda oltinchi raqam ostida o'ynadi va so'nggi 9-turda amerikalik Levon Aronyan bilan murosaga keldi. Besh yarim ochko jamg'argan Rameshbabu qo'shimcha ko'rsatkichlarga ko'ra musobaqa chempioni bo'ldi. 

Franciyalik Alireza Firuzdja qora donalarda harakat qilganiga qaramay, ruminiyalik Bogdan-Daniel Dikni mag'lubiyatga uchratdi. Yana bir francuz shaxmatchisi Maksim Vashe-Lagrav polshalik xalqaro grossmeyster Yan-Krishtof Dudadan ustun keldi. Hindistonlik Dommaradju Gukesh hamda amerikalik Fabiano Karuana partiyasida tomonlar murosaga kelishdi. 

Malumot uchun, Nodirbek Abdusattorov 1 g'alaba, 7 durang va 1 mag'lubiyat bilan turnir yakunida 4,5 ochko jamg'ardi. Hamyurtimiz musobaqadagi yagona mag'lubiyatini aynan Rameshbabudan qabul qilib oldi.