Rasman. Ramazon Temirov oktagonga chiqadigan turnirning asosiy jangi tasdiqlandi + POSTER

Tashkilotchilar ushbu oqshomning asosiy jangini rasman tasdiqlashdi. Unda o'ta engil vazn toifasi vakili (57 kilogrammgacha) qozog'istonlik Asu Almabaev portugaliyalik Manel Kapega qarshi oktagonga chiqadi. Asu jarohat olgan Brendon Royvalning o'rniga Manel Kapega qarshi jang qilishi aytilgandi. Ushbu xabar rasman o'z tasdig'ini topdi.

SHu tariqa, UFC promousheni rahbarlari Kape ishtirokidagi turnirning asosiy jangini saqlab qolishdi. Qozog'istonlik 31 yoshli aralash yakkakurash ustasi mag'lubiyatsiz seriya bilan kelmoqda. U UFC oktagonida 4 ta g'alaba qayd etgan. Oxirgi jangida Mateus Nikolauni ochkolar hisobiga ko'ra mag'lubiyatga uchratgandi. Manel Kape esa o'tgan yilning dekabrida Bruno Silvani uchinchi raundda texnik nokaut evaziga taslim etgandi. 

Ayni paytda Manel Kape hamda Asu Almabaev mos ravishda o'ta engil vazn toifasi reytingida oltinchi va sakkizinchi o'rinlarni band etgan. Almabaev UFC turnirlarining markaziy bahsida oktagonga chiqqan ilk qozog'istonlik jangchiga aylanadi. 

Eslatib o'tamiz, hamyurtimiz Ramazon Temirov ham shu oqshomda o'zining promoushendagi ikkinchi jangini o'tkazadi. U aynan Asu bilan bitta vazn vakili hisoblanadi. G'alabali seriya davom etsa, ikki qo'shni jangchilar oktagonda bir-birlariga qarshi to'qnash kelib qolishlari mumkin.