Rasman: Samvel Babayan – “Lokomotiv” bosh murabbiyi

Futbol muxlislariga yaxshi malum,  Samvel Babayan asosan “Paxtakor” futbol klubidagi bir necha yillik faoliyati orqali keng jamoatchilikka tanilgan.  Uning katta tajribasi hamda o'zbek futbolidagi samarali mehnatini inobatga olib “Lokomotiv” PFK uni bosh murabbiy sifatida klubga taklif etdi. 

Samvel Babayan “Paxtakor”dagi faoliyati davomida ko'plab yutuqlarni qo'lga kiritgan.  U rahbarlik qilgan yillari “Paxtakor” 9 bor mamlakat milliy chempionati hamda 8-marta O'zbekiston Kubogi g'olibi deb topilgan. Bundan tashqari “Paxtakor”ning ikki bor Osiyo chempionlar ligasi yarim finaliga qadar etib borishida,  shu qatorda 2002-yil mavsum yakunlariga ko'ra “Osiyoning eng yaxshi futbol klubi” deb topilishida qo'shgan hissasi katta. 

Bundan tashqari Samvel Babayan O'zbekiston milliy terma jamoasi bosh murabbiyi sifatida ham samarali mehnat qilgan hamda uning qo'l ostida 42 nafar futbolchi mamlakat bosh jamoasida o'z debyutini nishonlagan. SHuningdek, Samvel Vyacheslavovich turli yillarda O'zbekistonning olimpiya, yoshlar va o'smirlar terma jamoalariga “Paxtakor” menejeri sifatida 200ga yaqin futbolchilarni tarbiyalab bergan.  Yana shuni takidlash joiz, Samvel Babayan o'zbek futboliga qo'shgan ulkan hissasi tufayli ikki bor O'zbekistonning “Eng yaxshi murabbiyi” deb topilgan. 

O'ylaymizki,  shunday mutaxassisning katta tajribasi endilikda “Lokomotiv” futbol klubining yangi yutuqlarni qo'lga kiritishida qo'l keladi. 

“Lokomotiv” futbol klubi uchun Samvel Babayandek etuk futbol mutaxassisini o'zaro hamkorlik asosida ish yuritishga taklif etish katta sharaf hisoblanadi hamda u kishining keyingi faoliyatiga omad tilab qolamiz. 

Samvel Babayanning erishgan yutuqlari: 

O'zbekiston chempioni – 2002,  2003,  2004,  2005,  2006,  2007,  2012,  2014,  2015-yillar,  “Paxtakor”

O'zbekistonning vice chempioni – 2008,  2009,  2010-yillar,  “Paxtakor”

O'zbekiston Kubogi sohibi – 2001/02,  2002/03,  2004,  2005,  2006,  2007,  2009,  2011-yillar,  “Paxtakor”

Osiyo CHempionlar Ligasi yarim finalchisi – 2002/03,  2004,  “Paxtakor”

Hamdo'stlik kubogi sohibi – 2007-yil,  “Paxtakor”

O'zbekistonning eng yaxshi murabbiyi – 2014,  2015.