Ravshan Haydarov: "O'zbekiston finalda faqat g'alaba haqida o'ylamoqda"

Xabaringiz bor, musobaqaning hal qiluvchi final bahsida O'zbekiston va Vetnam terma jamoalari o'zaro bahs olib borishadi. Bo'lajak o'yinda muxlislar jamoamizning g'alabasini kutishmoqda.

Final oldidan terma jamoa bosh murabbiyi Ravshan Haydarov o'z fikrlari bilan o'rtoqlashdi:

- "Biz musobaqada hozircha beshta o'yin o'tkazdik va har bir bahs o'ziga yarasha qiyin kechdi. Albatta, har qanday o'yin o'ziga yarasha saboqdir, g'alaba yoki mag'lubiyat bo'lsa ham. Ammo endi ortda qolgan o'yinlarni unutib, etiborni finalga qaratishimiz kerak".

- "Ayni paytda bor etiborimimz finalda Vetnamni yutishga qaratilgan. Jamoam bu uchrashuvga tayyor. Biz faqat g'alaba haqida o'ylayapmiz. Barcha jamoalar finalda o'ynashni orzu qiladi, chunki bu juda muhim bahsdir. Sezib turibman, final og'ir kechadi, raqibimiz Vetnam ham o'ziga yarasha kuchli jamoa. Har holda bunday musobaqalarda kuchsiz jamoa o'z-o'zidan finalga chiqib qolmaydi".