Razambek Jamalov Budapesht turniri g'olibiga aylandi! Bekzod Abdurahmonov esa...

Kun davomida -74 hamda -86 kg toifalarida erkin kurashchilarimiz gilamga ko'tarildi.

-74 kg vazn toifasida delegaciyamiz hisobiga Olimpiada licenziyasini olib bergan Bekzod Abdurahmonov musobaqani chorak finaldan boshladi. U ilk jangida kanadalik Adam Tomsonni mag'lubiyatga uchratdi. Yarim final bellashuvida esa Abdurahmonov mezbon yurt sportchisi Murad Kuramagomedovga imkoniyatni boy berib qo'ydi. SHundan so'ng, Tokio-2020 Olimpiadasi sovrindori Bekzod Abdurahmonov qirg'izistonlik Orozbek Toktomambetovga qarshi bronza medali uchun kechadigan bellashuvda gilamga chiqmadi va g'alaba qirg'izistonlik sportchiga berildi.

Ushbu vaznda O'zbekiston sharafini himoya qiladigan yana bir sportchi - Razambek Jamalov esa ilk davrada venesuelalik Kris Monteroni, chorak finalda gruziyalik Georgiy Elbakidzeni mag'lub etdi. Yarim finalda esa sportchimiz eronlik Ali Abbos Rezaiguzgelega hech qanday imkoniyat qoldirmadi. Jamalov final bellashuvida Bekzod Abdurahmonovni yarim finalda qoldirib ketgan Vengriya vakili Murad Kuramagomedovni 7:3 hisobida taslim etib, musobaqa g'olibiga aylandi. Avvalroq, aynan ushbu musobaqa orqali Parij Olimpiadasida -74 kg vazn toifasida  terma jamoamiz sharafini kim himoya qilishi oydinlashishi mumkinligi xabar qilingan edi.

-86 kg vazn toifasida terma jamoamiz azosi Boburjon Islomov ham yarim finalda mag'lub bo'ldi. Bronza medali uchun kechgan bellashuvda u imkoniyatni boy berib qo'ydi.